Испания ва Болгария ўйини куннинг натижасини олдиндан тахмин қилиш осон бўлган ўйини эди. Испанлар шу вақтгача гол ўтказмай келмоқда, болгарлар эса фақат бир гол урган ва бирорта очко тўпламаганди. Меҳмонлар дарвозабони Вуцов имкон қадар ҳаракат қилди, агар унинг сейвлари бўлмаганида ҳисоб биринчи бўлимнинг ўзида йирик кўриниш олган бўларди. Фақат яримҳимоячи Микел Мерино яна бир бор ўзининг ҳужумчилик хислатларини ёдга олди ва бўлим охирларида ҳисобни очди. Иккинчи бўлим бошида эса дублни расмийлаштирди. «Арсенал» футболчиси саралаш босқичидаги тўрт ўйинда 6 гол уришга улгурди. Ўйин давомида Атанас Чернев автогол муаллифи бўлиб, ҳисобни тенглаштирди. 90+2-дақиқада Микел Оярсабал пеналтини аниқ ижро этди – 4:0. Жами тўплар нисбати эса идеал кўринишда 15:0! Лекин навбатдаги йирик ғалабадан кейин ҳам испанлар ҳали мундиал йўлланмасини ҳал қилмади.
Испанлар ҳали ҳам йўлланмани кафолатламаганига эса турклар айбдор. Туркия Гуржистонни яна бир бор мағлуб этди ва испанлар билан орадаги уч очколик фарқни сақлаб қолди. Турклар ўзаро ўйингача иккинчи ўрин учун рақобатчиси бўлмиш гуржистонликлардан фақат уч очко олдинда эди. Шу туфайли бу ўйин натижасига қараб кўп нарса ўзгариб кетиши мумкин эди. Аммо меҳмонлар кутилганидек кураш таклиф эта олишмади ва мезбонлар биринчи бўлимнинг ўзида учта гол фарқи билан олдинга чиқиб олишди.
Танаффусдан кейин эса Винченцо Монтелла шогирдлари рақибга деярли имкон бермади. Энди Вилли Санйол шогирдлари иккинчи ўринга чиқиши учун фақат мўъжиза керак бўлади. Бунинг учун улар Испания ва Болгарияга қарши ўйинларда ғалаба қозониши, шунингдек, турклар қолган икки ўйинда ҳам йирик ҳисобда мағлуб этишидан умид қилиши керак бўлади. Очколар тенг келган тақдирда барчасини тўплар нисбати ҳал қилади: ҳозирча бу борада туркларнинг вазияти анча яхшироқ («-3»га қарши «+3»).
Италия бу ўйинга, шубҳасиз, яққол фаворит сифатида етиб келди, аммо сентябрдаги Исроил билан ўйиндаги триллердан (5:4) кейин ҳар нарсани кутиш мумкин эди. Лекин «Скуадра адзурра» хатолардан сабоқ чиқаргани ва Женнаро Гаттузо ҳимояда тартиб ўрнатгани ойдинлашди. Олдинги чизиқда эса одатдагидек Матео Ретеги ўзини кўрсатди, унинг дубли ва қўшимча дақиқаларда Манчини урган гол йирик ҳисобдаги ғалабани таъминлади.
Италия ҳозирча иккинчи ўринни мустаҳкамлади. Исроил устидан ғалаба жамоани гуруҳ пешқадами Норвегияга уч очколик масофада яқинлаштирди. Аммо италянлар ўзаро ўйинда норвегларни енгган тақдирда ҳам ушбу рақибдан тўплар нисбати бўйича анча ортда қолади. Биринчи ўринга чиқиб олиш эса фақат ақл бовар қилмас воқеалар бўлиб ўтишини талаб қилади. Ҳозирда Италияда тўплар нисбати «+10», Норвегияда – «+26». Шунинг учун норвеглар кейинги турда ўз уйида Эстонияни мағлуб этадиган бўлса, амалда ЖЧ-2026 га тўғридан тўғри йўлланмани ўзиники қилади. Италия эса ўтиш ўйинлари орқали ўз имкониятини синаб кўришига тўғри келади.
Эстония ва Молдова жамоалари учун саралаш турнири амалда якунланган. Ушбу жамоалар ЖЧ-2026 йўлланмаси учун назарий имкониятни ҳам йўқотган. Шу туфайли ўзаро учрашувда улар фақат мухлисларига таскин берувчи ғалаба учун ўйнашди. Аммо якунда дуранг қайд этилди. Молдова олти тур ичидаги илк очкосини қўлга киритди, Эстония ушбу рақиб устидан иккинчи ғалабасига эришиш имконини қўлдан бой берди.
13 ноябр. Норвегия – Эстония, Молдова – Италия.
16 ноябр. Исроил — Молдова, Италия – Норвегия.
Португалия миллий жамоаси Будапештда бўлиб ўтган биринчи ўйинда Венгрияни қийинчилик билан мағлуб этганди (3:2). Ва венгрлар «Жозе Алваладе»да ҳам рақибга жиддий муаммолар туғдира олди. Бу сафар улар саккизинчи дақиқадаёқ ҳисобни очишди: Аттила Салаи Собослаи бурчакдан узатган тўпни дарвоза тўрига жойлаб қўйди. Аммо кейин Криштиану Роналду катта саҳнага чиқди. Ушбу 40 ёшли футболчи 22-дақиқада Нелсон Семедунинг ўнг қанотдан узатмасини голга айлантирди ва жаҳон чемпионатлари саралаш босқичлари доирасида энг кўп гол урган (41) футболчига айланиб, навбатдаги рекордни ўрнатди. Биринчи бўлимга қўшиб берилган дақиқаларда эса Нуну Мендешнинг чап қанотдан кросс узатмасига етиб бориб, жамоасини ҳисобда олдинга олиб чиқди. Энди Роналду карерасидаги голлар сонини 948 тага етказиб олди.
Португалия 90+1-дақиқагача ЖЧ-2026 йўлланмасига эга бўлиб турганди. Аммо мезбонлар сўнгги дақиқаларда Доминик Собослаини жарима майдони ичида ёлғиз қолдиришди, у эса португалларнинг байрамини кейинга қолдирди. Энди Венгрия иккинчи ўринга чиқиб олди, Португалия эса энди сафарда Ирландияни енгиши талаб этилади. Бу гуруҳда ҳали ҳеч нарса аниқ эмас.
Ирландия терма жамоаси 4-тур олдидан атиги бир очкога эга эди. Шу туфайли Арманистонга қарши ўйин улар учун ҳаёт-мамот масаласига айланди. Бу ўйин натижасига кўра ирландлар ёки ЖЧ-2026 йўлланмаси учун пойгада қолар, ёки 99 фоизга имкониятни йўқотарди. Ўйин кутилганидек анча асабий кечди: арманлар сабр билан ва сифатли ҳимояланди. Аммо 52-дақиқада меҳмонлар сардори Тигран Барсегян жамоадошларини қийин аҳволга солиб қўйди. У Финн Азазга қўполлик ишлатиб, қизил карточка олди ва майдонни эрта тарк этди. 70-дақиқада эса Эван Фергюсон ирландларнинг ғалаба голини урди.
Энди Арманистон учун кейинги турда ўз уйида Венгрияга қарши ўйин ҳал қилувчи аҳамият касб этади. Охирги турда эса Португалияга сафар кутмоқда.
Англия миллий жамоаси кутилганидек жаҳон чемпионати йўлланмасини кафолатлади. Бунинг учун Томас Тухел шогирдлари финишга икки тур қолганида Латвияни мағлуб этиши кифоя қиларди. Инглизлар сафар ўйинида жиддий қаршиликка дуч келмади. Биринчи бўлимда Энтони Гордон ҳисобни очди, Ҳарри Кейн эса дублни расмийлаштириб, ҳисобни йириклаштирди, бу ушбу ҳужумчи учун Германия чемпионатига кетганидан кейин миллий жамоада урилган 17- ва 18-голлар бўлди. Бу эса ўзига хос рекорд кўрсаткич. У ўтган асрнинг 80-йилларида «Барселона» футболчиси сифатида «Уч шерлар» учун 17 гол урган Гари Линекернинг рекордини янгилади.
Танаффусдан кейин Максим Тонишев ўз дарвозасини ишғол этиб қўйди, 86-дақиқада эса Эберечи Эзе якуний натижани ўрнатди. 5:0 – инглизлар АҚШ, Мексика ва Канада мезбонлик қиладиган мундиал учун сафар халталарини тайёрлашни бошлаши мумкин.
Ўтган турда ўз уйида Албаниядан учралган аламли мағлубиятдан (0:1) кейин Сербиянинг тақдири ўз қўлида эмас. Қолаверса, серблар бош мураббийсиз қолган: Драган Стойкович ашаддий рақибдан учралган мағлубиятдан кейин истеъфога чиқди. Шу туфайли жамоа Андоррага қарши ўйинга вақтинча мураббий билан йўл олди. Учрашув эса кутилмаган сценарийда бошланди. 17-дақиқада мезбонлар ҳисобни очишди – форвард Гийом Лопес деярли майдон марказидан чиройли гол урди.
Аммо бир неча дақиқа ўтиб Кристиан Гарсия ўз жамоаси дарвозасини ишғол этиб қўйди. Иккинчи бўлимда эса Душан Влаҳович ва Александр Митрович биттадан гол уришди. Сербия қийинчилик билан бўлса-да, ғалабага эришди ва Албания билан орадаги фарқни бир очкогача қисқартирди.
Ноябрда жамоалар гуруҳдаги иккинчи ўрин учун сиртдан кураш олиб боришади. Сербия Албанияни қувиб ўтиб, иккинчи ўринни эгаллаш учун сафарда Англияни енгиши, шу билан бирга, албанлар Андоррада очко йўқотишидан умид қилиши керак бўлади.
