Исроилда ҳукумат тузиш учун кураш
7 ноябр куни Исроил президенти Исхак Ҳерцог бош вазир Бинямин Нетаняҳунинг асосий рақиби, армия Бош штабининг собиқ бошлиғи Гади Айзенкотга янги ҳукумат тузиш ваколатини берди.
27 октябр куни бўлиб ўтган сайловда Нетаняҳунинг «Ликуд» партияси диний-миллатчи коалиция билан бирга жами 53 ўрин олди. Бу ҳукумат тузиш учун зарур бўлган 61 ўринга етмайди.
Айзенкотнинг «Яшар» партияси 21 ўрин, унинг тўрт партиядан иборат блоки эса 48 ўрин олди. Араб озчилигининг икки партияси эса илгари кузатилмаган даражада, яъни 19 ўрин қўлга киритди.
Араб партиялари билан бирга Айзенкот кўпчиликка эга бўлиши мумкин, бироқ у улар билан иттифоқ тузишни рад этган. Шунга қарамай, Нетаняҳу сиёсатини ирқчилик деб билган араб етакчилари Айзенкотни тавсия қилди. Натижада у энг кўп қўллов олган номзодга айланди.
Айзенкотга ҳукумат тузиш учун 28 кун берилади, бу муддат яна 14 кунга узайтирилиши мумкин. Reuters'нинг ёзишича, унинг олдида учта йўл бор.
Биринчиси, араб партиялари муҳим масалаларда қўллаб-қувватлайдиган озчилик ҳукумати. Иккинчиси, илгари ўзи четлаб келган ултра-ортодокс партиялар билан коалиция. Учинчиси, Нетаняҳу билан бирлик ҳукумати. Бироқ таҳлилчилар бу вариантлар рўёбга чиқиши қийин, деб ҳисоблайди.
66 ёшли Айзенкот сиёсатга 2022 йилда кирган. 2023 йилдаги Ҳамас ҳужумидан кейин у Нетаняҳунинг уруш ҳукуматида қисқа муддат ишлаб, мухолифатга қайтган. Шундан буён у Нетаняҳуни, жумладан, Ғазодаги ҳарбий амалиётни бошқариши учун очиқ танқид қилиб келяпти ва у билан бир ҳукуматда ишламасликка қасам ичганди.
Агар Айзенкот ҳукумат туза олмаса, бу вазифа бошқа номзодга топширилади. Тахминан 100 кун ичида ҳеч ким ҳукумат туза олмаса, Исроилда яна сайлов ўтказилади. Бунга қадар Исроил ҳукумати бошқаруви Нетаняҳуда қолади.
Мисрда поездлар тўқнашди
Мисрнинг Гиза шаҳри яқинида икки йўловчи поезди тўқнашиши оқибатида камида 7 киши ҳалок бўлди, 110 дан ортиқ инсон жароҳатланди.
Миср темирйўл бошқармасининг маълум қилишича, 8 ноябр куни тушдан сўнг Гизадан Файюмга кетаётган поезд релсда тўхтаб турган бошқа поезднинг орқа қисмига урилган. Тўқнашув натижасида бир нечта вагон изидан чиқиб, қияликдан пастга қулаб тушди. Ҳалок бўлганлар орасида поезд машинистларидан бири ҳам бор.
