Олий ҳарбий таълим битирувчилари 5 йил хизмат ўтамаса, ўқитиш харажати ундирилади

Президент қарори билан “Ўзбекистон фуқароларининг ҳарбий хизматни ўташ тартиби тўғрисида”ги низомга ўзгартиш ва қўшимча киритилди. Унга кўра, олий ҳарбий таълим муассасаларини битирганлар офицер лавозимларида 5 календар йил хизмат ўтамаса, уларни ўқитишга сарфланган маблағлар давлат бюджетига ундириб олинади. Шунингдек, ходим сифатида бошқа идораларга йўналтирилган битирувчилар учун ҳам 5 йил хизмат мажбурияти қонунан мустаҳкамланади.

Фото: Sputnik / Рамиз Бахтияров

Амалдаги қоидаларга мувофиқ, олий ҳарбий таълим муассасаси битирувчилари ўқишни якунлагандан сўнг офицерлар таркиби лавозимларида 5 календар йил ҳарбий хизматни ўташи шарт эди, хизмат ўталмаса, ўқитиш харажатларини қайтариш мажбурияти бор.

Янги қарор билан шу норма аниқлаштирилди ва кучайтирилди: агар битирувчи офицер лавозимида 5 йил хизмат қилмаса, ўқитиш учун сарфланган маблағлар ундирилади.

Амалиётда баъзи битирувчилар ҳарбий хизматчи сифатида эмас, ходим тариқасида бошқа вазирлик-идораларга юборилаётгани инобатга олиниб, улар учун ҳам ходим сифатида 5 календар йил хизматни ўташ мажбурияти қонунчиликда белгилаб қўйилди. Мажбурият бажарилмаса, харажатлар ундирилади.

Кучга кириши: қарор расмий эълон қилинган санадан амалга киритилади.