Аэропортда дорилар контрабандасига уриниш фош этилди

“Тошкент-АЭРО” Ихтисослаштирилган божхона комплекси “Тошкент халқаро аэропорти” чегара божхона пости ходимлари Деҳлидан келган йўловчининг ҳийласини бартараф этди: у Умрадан қайтган зиёратчидек кўринишга уринган ҳолда 1 798 дона, қиймати салкам 205 млн сўм бўлган дори воситаларини яширинча олиб кирмоқчи бўлган.

Фото: Видеодан кадр

Маълумотларга кўра, Деҳлидан учиб келган йўловчи аэропортнинг келиш залида айнан шу пайтда Умра сафарида бўлган йўловчилар ҳам қайтаётганини кўриб, назоратдан четлаб ўтиш мақсадида ҳийла режалаштирган. У ҳожатхонада кийимини алмаштириб, ўзини зиёратчидек тутишга ҳаракат қилган.

Бироқ чегара божхона пости ходимлари йўловчининг хатти-ҳаракатларидан шубҳаланиб, уни белгилаб олиб, багажини белгиланган тартибда кўздан кечирди. Текширув натижасида чамадонда турли номдаги 1 798 дона дори воситаси аниқланди ва уларнинг умумий қиймати салкам 205 миллион сўм экани маълум бўлди.

Ҳозирда ҳолат юзасидан божхона текширувлари давом эттирилмоқда.

Тайёрлаган: Отабек Матназаров

#контрабанда #дорилар #Аэропорт