Мерц: украиналик эркаклар она юртида хизмат қилиши керак

Германия канцлери Фридрих Мерц украиналик эркакларни Германияга келмасдан, ўз юртида қолишга чақирди. У шунингдек, Украинадан келаётган янги қочқинлар Bürgergeld фуқаролик нафақасини олиш ҳуқуқидан маҳрум этилишини тасдиқлади.

Фото: AP

ГФР канцлери Фридрих Мерц Украинадан чиққан ёш эркаклар Германияга келмасдан, «ўз мамлакатларида хизмат қилиши» кераклигини айтди. Бу ҳақда у 13 ноябр куни Берлинда бўлиб ўтган Германия Савдо конгрессида қилган нутқида баён қилди. «Мен Украина президенти Володимир Зеленскийдан бунинг таъминланишини сўрадим», — деди Мерц. Унинг сўзларига кўра, «украиналик ёш эркаклар Украинада керак».

Федерал канцлер шунингдек, ҳукумат режаларига кўра, энди Украинадан келган қочқинлар «бюргергелд» (Bürgergeld) деб номланувчи фуқаролик нафақасини олиш ҳуқуқига эга бўлмаслигини тасдиқлади. Унинг ўрнига уларга бошпана изловчиларга имтиёзлар тўғрисидаги қонун асосида тўловлар берилади. Мерцнинг таъкидлашича, ҳукумат украиналиклар Германияда иш қидириши, «ижтимоий тўловлар тизимида қолиб кетмаслиги» учун «аниқ ўзгаришлар киритишга» интиляпти.

Ҳукуматдаги манбаларга кўра, меҳнат вазири Бербел Бас ва ички ишлар вазири Александр Добриндт янги қоидалар юзасидан келишиб олган. Унга мувофиқ, 2025 йил 1 апрелидан кейин келган украиналиклар «бюргергелд» олиш ҳуқуқини йўқотади. Ўзгаришлар орт сана билан (ретроактив) кучга киради, аммо олдин тайинланган тўловлар муддати тугагунча сақланиб қолади.

Бу келишув умуман олганда ёзда идоравий мувофиқлаштириш учун юборилган ГФР Меҳнат вазирлиги лойиҳасини тасдиқлайди. Ҳукумат доираларида тушунтирилишича, «бошқа ҳар қандай қарор маъмурий харажатларни кескин ошириб юборган бўларди». Вазирлар маҳкамаси ушбу ўзгаришларни келаси ҳафта маъқуллаши режалаштирилган.

Bild газетаси маълумотларига кўра, янги норма туфайли бир неча ўн минглаб украиналиклар «бюргергелд» олиш ҳуқуқидан маҳрум бўлади, аммо 1 апрелга қадар келганлар ушбу тўловни сақлаб қолади.

Қонунчилик режимини ўзгартириш деб аталган чоралар ҳисобидан 2026 йилда бюджет учун тахминан 730 млн евро тежамкорлик кутилмоқда — шундан 680 млн евро федерал марказ ҳиссасига ва 50 млн евро коммуналар ҳиссасига тўғри келади. 2027 йилда тежамкорлик ҳажми тахминан 320 млн еврони ташкил этади — 300 млн евро федерал, 20 млн евро коммуналар учун.

Шу билан бирга, федерал ерлар ва муниципалитетлар бошпана изловчиларга имтиёзлар тўғрисидаги қонун бўйича тўловлар учун сезиларли қўшимча харажатлар кўряпти. 2026 йилда улар тахминан 862 млн евро, 2027 йилда эса 394 млн евро атрофида бўлиши мумкин. Ерлар федерал ҳукуматдан компенсация олиши лозим.

Умуман олганда, давлат учун аниқ тежамкорлик кутилмаяпти, чунки бошпана изловчиларга имтиёзлар тизимидаги маъмурий харажатлар юқорироқ бўлади.

Тайёрлаган: Отабек Матназаров

#Германия #Фридрих Мерц