Ўзбекистон тарихида илк бор аёл каратэчи жаҳон чемпионига айланди

Ўзбекистонлик Гулшан Алимардонова 27-30 ноябр кунлари Мисрнинг Қоҳира шаҳрида карате бўйича бўлиб ўтган жаҳон чемпионатида -50 кг вазн тоифасида олтин медални қўлга киритди.

У финалда малайзиялик Шаҳмаларани Чандранни 6:1 ҳисобида мағлуб этди.

Спорт вазирлиги хабарида бу ғалаба «тарихий ютуқ» деб аталган ва Гулшан Алимардонова жаҳон чемпиони бўлган илк ўзбекистонлик аёл каратечига айлангани қайд этилган.

Шу пайтга қадар ушбу спорт тури бўйича жаҳон чемпионатларида Ўзбекистондан фақат Дастонбек Отаболаев олтин медалини қўлга киритган эди.

Алимарданова ноябр ойида Ар-Риёдда бўлиб ўтган Ислом бирдамлик ўйинларида эронлик рақибига ютқазиб, кумуш медал олганди. Октябр ойида эса Озарбойжонда III МДҲ мамлакатлари ўйинларида олтин медалга сазовор бўлган.

Халқаро карате федерацияси рейтингида (WKF) у 300 дан ортиқ спортчи орасида 1737.5 очко билан 15-ўринда қайд этилган.

Унинг ҳисобида Ўзбекистон ва Хитойда ўтказилган қитъа биринчиликларида қўлга киритилган иккита олтин ҳам бор. У Фужайрадаги ёшлар лигаси турнирида битта бронза медални қўлга киритиб, 24-ўринни эгаллаганди. Унинг Малайзиядан бўлган рақиби 11-ўринда жойлашганди.

19 ёшли спортчи бутун фаолияти давомида 37 жанг ўтказган, ғалабалар улуши 78,38 фоизни ташкил этади.

Маълумот учун, WKF рейтингида биринчи ўринни қозоғистонлик Молдир Жангбирбай эгаллаб турибди. Кучли учликни Жазоир ва Италия вакиллари тўлдирган.