“Ҳеч қачон таслим бўлмаслик керак” – полиглот ўзбек қизи билан суҳбат

Муҳаббат Файзуллаева Тошкентда туғилиб ўсган. Ёши 24 да. У ҳозирда АҚШнинг Иллинойс штатидаги Люис университетида ёзувчилик йўналишида таҳсил олади. У ўзбек тилидан ташқари рус, инглиз, италян, испан ҳамда турк тилларида гаплаша олади. Муҳаббат Kun.uz'га берган интервюсида чет тилларини қандай ўргангани, қолаверса, Америкага қандай келиб қолгани, нима сабаб иқтисодиёт соҳасидан кетиб санъат йўналишида ўқиётгани ҳақида гапириб берди.

{Yii::t(}

Ўтказиб юбориш 6s

Ўтказиб юбориш

Муҳаббат ўзбек, рус, инглиз, италян ҳамда турк тилларини жуда яхши билади. Аммо испанчаси у даражада эмас, қисман гаплаша олади ва тушунади.

“Рус тилини жуда яхши биламан, чунки рус мактаби ва рус лицейида ўқиганман. Шунинг учун рус адабиёти, маданияти, мусиқаси менга жуда яқин. Кейин инглиз тилига келадиган бўлсак, уни ўрганишни 15 ёшдан бошлаганман. IELTS’дан саккиз балл олганман. Шарқшунослик лицейида испан тилини ўрганганман.

Кейин Италияга ўқишга кетдим. Италян оилада яшадим. Шу оилада ёш боладек бир марта ҳам китоб очмасдан италян тилини оғзаки ўрганганман. Турк тилини эса сериаллар кўриб ўрганганман”, - дейди у.

Суҳбатдошимиз 18 ёшида Италияга ўқишга кетган. Римдаги Тор Вергата университетида грант асосида бепул таҳсил олган. Иқтисодиёт ва сиёсий бошқарув йўналишида бакалавриатни якунлаган. Кейин Дубайда ҳам ишлайди.

“Кейин нима қилишни ўйладим. Холам билан поччам Дубайда яшарди. Улар Европа дипломи бўлса, Дубайда жудаям яхши иш топса бўлишини айтишганди. Шунга бордим. Кейин Future Insurance Broker Service деган компанияда 1 йил брокер бўлиб ишладим. Дубай зўр жой, жудаям хавфсиз ва замонавий. Лекин мен барибир санъат одами бўлганим учун табиат, архитектура, эскироқ жойларда яшаш ёқарди. Дубайда фақат ёз бўлганига ҳам чарчадим ва Ўзбекистонга қайтдим. Ўша пайт таътилим эди. Дубайга қайтиб кетишим керак эди, кетгим келмади. Ўзбекистонда жуда оиламни ҳам соғингандим.

Кейин Ўзбекистонда ярим йил ўқитувчи бўлиб ишладим. Шу орада Америкага ҳужжатларимни йиғиб юбордим. Кейин талаба визасини олдим. Қишларда Америкага келдим. Ҳозирда Люис университетида ўқияпман”, – дейди Муҳаббат.

У иқтисодиёт йўналишида магистратурага ҳам топширганини, Техас университетига кирганини, барибир санъат соҳаси кўпроқ жалб қилганини билдирди.

“Иқтисодиёт магистратурасида ўқигим келмади. Ўзим жудаям санъатга қизиққаним учун санъатда ўқишни бошладим. Менинг асосий йўналишим ўзи ёзувчилик, қўшимча йўналиш эса театр. Ўзимга жудаям ёқяпти. Биринчи йилни олиб ташлашди. Ўзи тўрт йил ўқишим керак эди. Уч йил дейишди, чунки аллақачон дипломим бўлганига умумий фанлар: математика кабилар сенга керак эмас, дейишди. Ҳозир шу икки йили қолди”, – деди у.

Муҳаббат тил ўрганиш доим иш эканини, осон эмаслигини тушунтиришга уринди.

“Баъзиларга қийин, баъзиларга осонроқ. Лекин тил ўрганиш ҳар доим бу иш, буни устида ишлайсиз. Масалан, менда рус тили автоматик тарзда ёшлигимдан аллақачон келган, шунга қийин бўлмаган. Бироқ инглиз тилига жудаям кўп тайёрланганман. Эсимда бор, соат тўртларгача дарс қилиб ўтирардим. Бутун ўсмирлик давримда ҳар доим жуда кўп дарс қилганман, жуда кўп ўқиганман, тайёрланганман, сўзлар ёдлаганман. Ҳозирги даражамга етиш учун инглиз тилида жуда катта иш қилганман. Аммо италян тилини, масалан, ёш боладек ўрганганман. Гаплашиб, италян оилада яшаганман. Улар инглиз тилида гапиришмасди. Шунга уларни тушунишдан бошқа иложим қолмаган. Тўғрисини айтсам, тил ўрганиш ҳеч қачон у даражда қийин бўлмаган. Албатта, ҳар доим ҳаракат қилишимиз керак. Тил ўрганиш учун ҳар доим устингизда ишлашингиз керак бўлади.

Мен қанақа тавсия берган бўлардим? Оддий, жўн эшитилиши мумкин ҳозир, лекин кўпроқ ўқиш керак. Кўпроқ ўқинг, кинолар кўринг. Масалан, одам кўпроқ ўқиса, тушунмаган сўзларини ҳам кўп марта учратаверса, қанақа маънога эгалигини тушуна бошлайди.

Тошкентда Америка элчихонаси бор. Инглиз тили ўрганмоқчи бўлган одамларга мен элчихонага боришни маслаҳат берардим. Ўзим шундай қилардим. Ҳар хил клублари бўларди. Ўша ерга келардим, гаплашардим. Кўп гаплашиб, ўзингизни шунақа муҳитга солишингиз керак. Эшитиш, ашулалар тинглаш, кинолар кўриш, китоблар ўқиш керак. Асосийси, таслим бўлмаслик лозим. Кўпинча, масалан, “Вой, қачон ўрганиб бўламан?” дейишингиз мумкин, “Хали шунча ўрганяпман, прогресс бўлмаяпти”. Йўқ, прогресс бўлади. Сиз секин кетавериш керак, ўсиш бўлади. Бошида қийин. IELTS’дан 8 балл олганман, лекин бошида 6,5 балл чиққанди. Шу вақтда ўйлагандим: “Қанақасига одамлар 8 балл олади?” деб. Лекин ишладим, ишладим. Кейин фурсати етиб, ўрганганларингиз ортидан ўсиш ўзи келади”, – дейди Муҳаббат.

Интервюнинг тўлиқ шаклини юқоридаги ҳавола орқали томоша қилишингиз мумкин.

Дилшода Шомирзаева тайёрлади.