«Салом, ая!» — қишлоқдан Америкага саёҳат | Манзил

«Манзил»нинг қишлоқлардан, тоғ-у тошлардан бошланган йўли бу гал океан ортига, Америка Қўшма Штатларига олиб борди. Бу галги саёҳат кўпчилик кўришни орзу қиладиган Ню Йоркдан бошланиб, Питтсбург, Пенсилвания ўрмонлари орқали Вашингтон шаҳригача давом этди.

{Yii::t(}

Ўтказиб юбориш 6s

Ўтказиб юбориш

Ню Йорк – мегаполис ичидаги яшил ҳудуд

Саёҳатнинг илк манзили – Ню-Йорк. Кўпчилик «дунё пойтахти» деб биладиган бу шаҳар нафақат улкан бинолари, балки шаҳарнинг қоқ марказида жойлашган Central Park каби яшил ҳудудлари билан ҳам ажралиб туради. 8,5 миллион аҳолига эга мегаполис марказида 341 гектар майдонни эгаллаган мазкур парк сунъий яратилган бўлса-да, табиий муҳитга яқин сақланган.

Саёҳат куз фаслига тўғри келди, бу вақтда сарғиш барглар билан қопланган кўчалар шаҳарга ўзига хос манзара ва хотиржамлик бағишлаганди.

Чекка қишлоқ билан узилмаган алоқа

Америка билан Ўзбекистон ўртасида 10 соатлик вақт фарқи мавжуд. Лойиҳа муаллифи Тоҳиржон Турсунов оиласи чекка туманнинг олис қишлоғида яшаса-да, саёҳат давомида Ўзбекистондаги яқинлар билан алоқа узилмади. «Ўзтелеком» интернет сифатининг чекка ҳудудларда ҳам барқарор ишлаши – мамлакатдаги рақамли инфратузилманинг ривожланаётганини кўрсатади. Дарвоқе, «Ўзтелеком»нинг АҚШдаги роуминг хизмати ҳам бу алоқанинг бир қисми бўлди. Америкага саёҳат қилувчиларга «Ўзтелеком» роуминг хизматини тавсия эътиб қоламиз.

Питтсбург – саноат тарихи ва ўзбеклар ҳаёти

Ню Йоркдан кейинги манзил – Пенсилвания штатида жойлашган Питтсбург шаҳри бўлди. Аллегейни ва Мононгахила дарёлари қўшилиб, Оҳайо дарёсини ҳосил қиладиган нуқтада жойлашган бу шаҳар тарихан АҚШнинг темир саноати маркази ҳисобланган. Шу сабабли у Steel City номи билан ҳам машҳур.

Бу ерда «Манзил» жамоасини асли наманганлик Иброҳим Муҳаммад кутиб олди ва Питсбург шаҳри, у ердаги ўзбекистонликлар билан тиништирди. Ўзбеклар томонидан очилган ошхоналарда меҳмон бўлдик.

Айтиш мумкинки, шаҳарда ўзбек диаспораси каттагина. Сўнгги йилларда ўзбеклар очган ошхона ва кафелар сони ортмоқда. Миллий таомлар орқали маҳаллий аҳолига ўзбек ошхонаси таништирилмоқда.

Тракдаги саёҳат: яхши ҳақ тўланадиган оғир меҳнат

Питтсбургдаги саёҳат давомида трак ҳайдовчилари ҳаёти билан яқиндан танишиш имкони бўлди. Америкада кўплаб муҳожирлар ушбу соҳа орқали даромад топмоқда. Бир қарашда осондек туюлган бу касб амалда катта масъулият, жисмоний тайёргарлик ва сабр талаб қилади.

Йўл давомида турли штатлар табиати, овқатланиш маданияти ва йўл инфратузилмасини кузатдик. Шунингдек, афсонавий боксчи Муҳаммад Алининг Кентукки штатида жойлашган қабри зиёрат қилинди.

Пенсилвания ўрмонлари ва табиий қоятошлар

Саёҳатнинг яна бир манзили – Пенсилвания штатидаги Bilger’s Rocks табиий қоятош мажмуаси бўлди. Тахминан 300 миллион йиллик тарихга эга бўлган ушбу ҳудуддаги инсон қўли билан қурилгандек тасаввур уйғотадиган тош деворлар кишини ҳайратга солади. Бу ерда қисқа дам олиш ва табиат қўйнида сайр қилиш имкони мавжуд. «Манзил» лойиҳасининг асоси табиат ва инсон уйғунлиги бўлгани туфайли, бу жой саёҳатимизда ўзига хос маскан бўлиб қолди.

Вашингтон – сиёсий марказ

Саёҳат Вашингтон шаҳрида якунланди. Ушбу шаҳар АҚШнинг расмий пойтахти бўлиб, ҳеч бир штат таркибига кирмайди. Оқ уй, Капитолий, Линколн ёдгорлиги ва Вашингтон монументи каби асосий тарихий ва сиёсий объектлар шу ерда жойлашган.

Шаҳар меъморий жиҳатдан ҳам ўзига хос: қонунга кўра, баланд бинолар қурилиши чекланган. Бу эса шаҳар осмонининг очиқ ва кенг сақланишига хизмат қилади.

Шу тариқа, Америкага саёҳат ўз ниҳоясига етди. Лекин кўпчилик сеҳрли диёр деб таърифлайдиган мамлакатга кейинги сафарларда бошқа манзилларни ҳам ўзимиз учун кашф этишни мақсад қилдик.