Чирчиқда ихтисослаштирилган боғчадаги видео бўйича ўрганиш ишлари бошланди

Ижтимоий тармоқларда Чирчиқ шаҳридаги 30-сонли ихтисослаштирилган мактабгача таълим ташкилотида имконияти чекланган болаларга нисбатан ноўрин муносабатда бўлингани акс этган видеолавҳа кенг муҳокамаларга сабаб бўлди.

Мазкур ҳолат юзасидан Ижтимоий ҳимоя миллий агентлигининг Тошкент вилояти бошқармаси томонидан ишчи гуруҳ тузилиб, тегишли масъуллар иштирокида хизмат текшируви олиб борилмоқда. Хусусан, тарбиячилар томонидан ушбу хатти-ҳаракатларга нега йўл қўйилгани, меҳнат интизоми ва болалар ҳуқуқларига риоя этилиши масалалари батафсил ўрганилмоқда.

Маълум қилинишича, ўрганиш жараёнида видеолавҳада акс этган ҳолатлар, муассаса раҳбариятининг масъулияти, шунингдек, болалар хавфсизлиги ва психологик муҳитини таъминлашга оид чоралар атрофлича таҳлил этилади.

Масъул идоралар билдиришича, хизмат ўргануви якунлари бўйича қўшимча ахборот тақдим этилади ҳамда қонунчиликка мувофиқ тегишли чоралар кўрилади.