Навоий ва Чирчиқ шаҳарлари аҳолиси тажриба-синов тариқасида жами йиллик даромадлари тўғрисидаги декларацияни тақдим этишининг тартиби белгиланди. 20 октябр куни бу ҳақдаги ҳукумат қарори эълон қилинди.
Ўзбекистон президентининг 2025 йил 10 декабрдаги қарорига биноан, солиқ органлари ходимлари ҳамда Навоий ва Чирчиқ шаҳарларида ҳисобга қўйилган жисмоний шахслар томонидан жами йиллик даромадлар тўғрисидаги декларацияни тақдим этиш амалиётини тажриба-синов тариқасида жорий этиш белгиланган эди. Вазирлар Маҳкамасининг 2026 йил 19 октябр кунги қарори билан бунинг тартибини белгиловчи вақтинчалик маъмурий регламент тасдиқланди.
Қарорга кўра, декларация 2026–2027 йилларда олинган даромадлар бўйича Солиқ қўмитасининг Электрон солиқ хизматлари портали (my3.soliq.uz) ва “Soliq” мобил иловаси орқали тақдим этилади.
Декларацияни Навоий ва Чирчиқ шаҳарларида доимий яшаш жойи бўйича рўйхатга олинган, 18 ёшдан катта жисмоний шахслар топширади. Бу икки шаҳарда ҳисобга қўйилганига олти ой тўлмаган шахслар ва ҳисобот йилида солиқ органига ишга қабул қилинган ходимлар декларация топширмайди.
2026 йил учун декларация 2027 йилнинг 1 апрелидан кечиктирмай, 2027 йил учун декларация эса 2028 йилнинг 1 апрелидан кечиктирмай тақдим этилиши керак. Солиқ органи муддатидан камида бир ой олдин хабарнома юборади.
Декларацияда:
- меҳнатга ҳақ тўлаш тарзидаги, мулкий, моддий фойда тарзидаги ва бошқа даромадлар (Солиқ кодексининг 371, 375, 376 ва 377-моддалари);
- кўчмас мулк, кўчар мулк ва мажбуриятлар (солиқлар, коммунал хизматлар ва кредитлар) бўйича харажатлар кўрсатилади;
- якка тартибдаги тадбиркорлар ва ўзини ўзи банд қилган шахсларнинг тадбиркорлик фаолияти билан боғлиқ харажатлар кўрсатилмайди.
