“Шимолий оқимлар”: Германияда украин фуқароси ҳибсда қолдирилди

“Шимолий оқим” газ қувурларидаги портлашлар иши бўйича гумонланувчи Украина фуқароси Сергей К. Германияда ҳибсда қолади. Германия Федерал суд палатаси (BGH) пайшанба куни, 15 январда айбланувчининг апелляцияси рад этилганини маълум қилди.

Фото: Danish Defense Ministry/Xinhua/picture alliance

Сергей К. Nord Stream иши бўйича асосий гумонланувчи деб ҳисобланади. Dpa агентлиги ёзишича, у газ қувурларини портлатиш операциясини мувофиқлаштирган, деган тахмин бор. Германия федерал прокуратураси уни портлашларни содир этишда шерикликда қатнашганликда ва конституциявий тузумга қарши қўпорувчилик фаолиятида айбламоқда.

BGH бош прокурор юрисдикциясига кирувчи жиноят содир этилгани бўйича кучли гумонлар мавжудлигини, шунингдек, қочиб кетиш хавфи сабаб Сергей К.ни ҳибсда ушлаб туриш учун асослар борлигини тасдиқлади. Қарор 2025 йил 10 декабр куни суднинг учинчи жиноят ишлари палатаси томонидан қабул қилинган.

AFP агентлиги таъкидлашича, Германия ҳудудий юрисдикцияга эга, чунки ишдан чиққан қувурлар Германия ҳудудида тугаган. Бундан ташқари, жиноят ГФРнинг ички хавфсизлигини заифлаштиришга қаратилган бўлиб, алоҳида аҳамиятга эга.

Сергей К. 2025 йил 21 августга ўтар кечаси Сан-Клементе (Римини вилояти)даги резиденцияда қўлга олинган. У қўлга олингандан кейин карабинерлар ижарага олинган турар жойни тинтув қилган. 20 август куни кечқурун италиялик полициячилар 49 ёшли гумонланувчи келишини кутган ва ҳибсга олишни режалаштирган. Резиденция эгаси ва ходимлар сўроқ қилинган, терговчилар айтишича, улар эркакни оиласи билан дам олишга келган оддий хорижлик, деб ўйлаган.

Германия ҳокимияти маълумотига кўра, Сергей К. 2022 йил сентябрда Данияга қарашли Борнхолм ороли ёнидаги Болтиқ денгизида “Шимолий оқим” ва “Шимолий оқим — 2” қувурларига портловчи моддалар қўйган гуруҳ таркибида бўлган. Терговчилар фикрича, портловчи моддаларни ташиш учун у ва шериклари Росток портидан денгизга чиққан елканли яхтадан фойдаланган.

Россиядан Германияга олиб борадиган Болтиқ денгизидаги “Шимолий оқим” ва “Шимолий оқим — 2” газ қувурларининг тўрт тармоғидан учтаси 2022 йил сентябр ойи охирида портлатилган. Ўша пайтда улар орқали газ узатилмаган. “Шимолий оқим” портлашлардан сал олдин Россия томонидан тўхтатилган, “Шимолий оқим — 2” эса Россиянинг Украинага ҳужуми фонида умуман ишга туширилмаган.

ШО-2нинг бир тармоғи омон қолган. Ҳодисадан кейин РФ президенти Владимир Путин ўша тармоқ орқали газ узатишни таклиф қилган, аммо Германия рад этган. Газ қувурларидаги портлашлар учун ҳеч ким жавобгарликни ўз зиммасига олмаган. Россия вакиллари эса бу ишга АҚШ ва Буюк Британия алоқадор бўлиши мумкин, деб шубҳа билдирган.