Kun.uz'га Юнусобод йўналишининг “9-даҳаси (“Уч қаҳрамон” кўчаси) – Чинни бозор” оралиғида ҳаракатланувчи 121-сонли автобусда тозаликка риоя қилинмагани кўрсатилган видеолар келиб тушди.
Тасвирларда транспортнинг ичи ва атрофлари чанг-ғуборга тўлгани кўринади. Мурожаат йўллаган йўловчилар автобус ҳар тебранганида ичидаги чанглар ҳавога кўтарилиб, одамларни безовта қилаётганини айтган.
“Автобус тозаликка умуман риоя қилмайди. Жудаям чанг, нафас олиб бўлмайди. Мана совуқ кунда ойналар очиқ. [Ёнимдаги йўловчи] ҳозир ниқоб тақиб олдилар”, – дейди автобусда кетаётган бир аёл.
Маълумотларга кўра, айни ҳолат 20 январ санаси соат 13:22 ҳамда 21:15 ларда кузатилган. Ҳар икки вақтда олинган видеоларда санитар ҳолат абгор экани кўринади. Kun.uz вазият юзасидан “Тошшаҳартрансхизмат” АЖга сўров юборди.
