13 сентябрга ўтар кечаси Ява денгизида ҳалокатга учраган Индонезия йўловчи паромидан бедарак йўқолганлар беш кундирки қидирилмоқда. Фожиа Ява ва Борнео оролларини боғловчи, тахминан 20 соатлик денгиз қатновида юз берганди.
Сурабая шаҳридан йўлга чиққан «Virgo Transport 8» паромининг капитани 3 метргача етган тўлқинлар орасида кема оғаётгани ҳақида фавқулодда сигнал юборган. Якшанба куни тунги соат иккилар атрофида эса алоқа узилган. Икки соатдан сўнг кема ўзи бораётган манзил – Банжармасиндан қарийб 148 километр наридаги сувларда ағдарилгани маълум бўлган.
Associated Press'нинг ёзишича, бортда 213 йўловчи, 30 экипаж аъзоси ва 89 та автомобил бўлган. Шу билан бирга агентлик Индонезияда йўловчиларнинг ҳақиқий сони рўйхатдагидан фарқ қилиши одатий ҳол эканини эслатади.
Ҳодиса оқибатида олти киши ҳалок бўлган, 108 киши омон қолган, 129 киши эса ҳамон бедарак. Reuters нашри бу рақамлар якшанба кунидан бери ўзгармагани ёзмоқда.
119 метрли паром 1987 йилда Японияда қурилганди. У ўтган йилгача кунчиқар юртда хизмат қилиб, сўнг Индонезиядаги ҳозирги оператори – PT Virgo C.SH. компаниясига сотилган.
Бир неча дақиқада юз берган фожиа
Омон қолганларнинг ҳикоялари ҳалокат нақадар тез юз берганини кўрсатади. Индонезия давлат ахборот агентлиги билан суҳбатлашган экипаж аъзоси Акмал ҳеч қандай огоҳлантирувчи белгини сезмаганини айтади: «Кема жуда тез, беш дақиқага қолмай чўкиб кетди». Унинг айтишича, у сигнални кемадан хавфсиз масофага етгачгина эшитган.
Паромда официант бўлиб ишлаган Ризки Априаншаҳни дўстлари тунги соат бирларда уйғотганида кема аллақачон қарийб 30 градусга оғиб қолган эди. Ризки ҳам огоҳлантирув сигнали чалинмаганини айтган. У дўстлари билан сувда қалқиб юрган катта газ баллонига ёпишиб, 10 соатча нажот кутган.
