Якшанбага ўтар кечаси Ява денгизида Virgo Transport 8 компаниясининг бортида жами 243 киши бўлган йўловчи пароми чўкиб кетди. Ҳодиса оқибатида олти киши ҳалок бўлгани тасдиқланган, 107 киши қутқарилган. Яна 130 кишининг тақдири номаълумлигича қолмоқда.

Ушбу кема шанба куни Ява оролидаги Сурабая шаҳридан Калимантан ороли (Борнео) жанубидаги Банжармасин шаҳри томон йўлга чиққанди. Денгиздан ўтиш чоғида об-ҳаво шароити ёмонлашган. Капитан кема бир томонга қийшайиб қолгани ҳақида хабар берган, кема билан алоқа узилиб қолгач, ҳукумат қидирув амалиётини бошлаган.

Банжармасиндаги қидирув-қутқарув агентлигига якшанбага ўтар кечаси соат 2:00 атрофида, кема билан алоқа йўқолганидан икки соат ўтганида

Кейинроқ кема ағдарилгани ва чўкиб кетгани маълум бўлган. Бортда 213 йўловчи ҳамда экипажнинг 30 нафар аъзоси бор эди.

Қутқарувчиларга кўра, кема охирги бор алоқада бўлганида соҳилдан тахминан 148 километр масофада ҳаракатланган. Воқеа жойига 4 та кемада қутқарув гуруҳлари, шунингдек, вертолётлар юборилган.

Қутқарувчилар ҳалокатдан омон қолган 107 кишини, шунингдек, 6 кишининг жасадини сувдан чиқариб олишган, яна 130 кишини қидириш ишлари давом этмоқда.

Якшанба куни Банжармасиндаги Трисакти портидаги бошқарув пунктига кемада бўлганларнинг юзлаб қариндошлари тўпланди ва яқинлари ҳақида хабар кута бошлади.

«Мен йўловчилар рўйхатида амакимнинг исмини кўриб, карахт ҳолатга тушдим. Аммо расмий шахслар у қутқарилганини айтишганидан кейин ўзимни бироз енгил ҳис қила бошладим», деган улардан бири журналистларга.

Индонезия – 17 мингдан ортиқ архипелаглардан ташкил топган бўлиб, бу ерда паром асосий транспорт воситаларидан бири ҳисобланади. Мамлакатда йўловчи кемалар иштирокидаги ҳодисала тез-тез рўй бериб туради ва кўп ҳолларда хавфсизлик чораларига амал қилинмагани сабаб сифатида келтирилади.

Ўтган ойда Индонезиянинг Бали ороли яқинида паромда ёнғин чиқиши оқибатида бир киши ҳалок бўлиб, 4 киши бедарак йўқолган, 211 киши қутқарилганди. Ундан икки ҳафта олдин эса «Мутира Сентос 2» номли яна бир паром Ява ороли яқинида ёниб кетиши оқибатида беш киши ҳалок бўлганди.