Доналд Трамп ва унинг миллий хавфсизлик масалалари билан шуғулланувчи асосий маслаҳатчилари 5 ноябрь куни Эрон масаласига бағишланган учрашув ўтказди.
Axios манбаларининг хабар беришича, Конгрессга бўлиб ўтган оралиқ сайлов Республикачилар партияси учун муваффақиятсиз якунлангач, АҚШ президенти Теҳронга нисбатан қандай йўл тутиш бўйича бир нечта вариантни кўриб чиқмоқда: 28 февраль куни Исроил билан ҳамкорликда бошланган ҳарбий ҳаракатларни қайта тиклаш, Эронга жиддий ён босишни талаб қилса-да, битим тузиш ёки Эронга иқтисодий босим ўтказишга урғу берган ҳолда статус-квони сақлаб қолиш.
Шу билан бирга, манбаларнинг таъкидлашича, ҳарбий сценарий ҳозирча устувор бўлиб қолмоқда ва АҚШ Қуролли кучлари Марказий қўмондонлиги Эронга қарши кенг кўламли операцияларни қайта бошлаш учун тайёргарликни якунлаган.
Ўз навбатида, Fox News телеканали манбаларининг маълум қилишича, оралиқ сайловдан сўнг Оқ уйда Эронга қарши кейинги ҳаракатлар бўйича маслаҳатлашувлар икки марта — 4 ва 5 ноябрь кунлари бўлиб ўтган. Телеканал маълумотларига кўра, ушбу йиғилишлардан сўнг Америка етакчиси 9 ноябрдаёқ Эронга қарши янги йирик операцияни бошлашга рухсат бериш фикрига мойил бўла бошлаган. Fox News суҳбатдошлари таъкидлаганидек, шу куни янги ой чиқиши кутилмоқда ва табиий ёруғликнинг йўқлиги Эронга қарши тунги ҳарбий-ҳаво рейдларини амалга ошириш учун идеал шароит яратади.
