Чегара орқали олиб ўтилган 77 килограммга яқин наркотик модда мусодара қилинди

Давлат хавфсизлик хизмати, Чегара қўшинлари ҳамда божхона ва ички ишлар органлари ходимлари томонидан ўтказилган тезкор тадбирлар давомида Сирдарё ва Сурхондарё вилоятларида йирик миқдордаги наркотик моддаларнинг ноқонуний айланмасига чек қўйилди.

Фото: Видеодан кадр

Сирдарё вилоятида ўтказилган тезкор тадбирда “Ўзбек-тожик” давлат чегарасининг Ховос тумани Шарқобод маҳалласи ҳудудидан ўтувчи қисмида тожикистонлик наркокурерлар томонидан чегара сим тўсиқлари орқали улоқтирилган 6 дона сумкани қабул қилиб олмоқчи бўлган икки нафар маҳаллий фуқаро чегара наряди томонидан қўлга олинди. 1983 ва 1990 йилларда туғилган мазкур шахслардан олинган сумкалар холислар иштирокида кўздан кечирилганда, улар ичида 8 килограмм 314 грамм “героин” ва 54 килограмм 458 грамм “опий” борлиги аниқланди.

Сурхондарё вилояти Сариосиё туманида ўтказилган тезкор тадбирда ушбу тумандаги умумий ўрта таълим мактабларидан бирида ўқитувчи бўлиб ишловчи, 1984 йилда туғилган фуқаро муқаддам тожикистонлик наркокурерлар келтириб берган 14 килограмм 680 грамм “опий” моддасини шартли харидорга 180 минг АҚШ долларига сотмоқчи бўлган вақтида ашёвий далиллар билан ушланди.

Ҳолатлар юзасидан мазкур шахсларга нисбатан Жиноят кодексининг 246-моддаси 2-қисми ҳамда 25,273-моддаси 5-қисми билан, шунингдек 273-моддаси 5-қисми билан жиноят ишлари қўзғатилиб, уларга нисбатан “қамоқ” эҳтиёт чораси қўлланди.

Ҳозирда ушбу жиноятларга алоқадор бошқа шахсларни аниқлаш ва наркоканалларнинг барҳам топиши юзасидан тезкор-қидирув тадбирлари давом этмоқда.

Фуқаролардан бундай қонунбузилиш ҳолатларига дуч келганда Давлат хавфсизлик хизматининг 1520 қисқа рақамига қўнғироқ қилиб хабар бериш сўралди. Шахснинг махфийлиги кафолатланади.