Давлат хавфсизлик хизматининг Тошкент шаҳар бўйича бошқармаси ва шаҳар ИИББ ходимлари ҳамкорликда ўтказган тезкор тадбирда автомобил Юнусобод туманидаги «Уч қаҳрамон» ЙПХ масканида тўхтатилган.
Текширувда машинада йўловчи сифатида кетаётган, 2004 йилда Сурхондарё вилоятида туғилган шахсга тегишли целлофан пакетдан 200 та зип-пакетга қадоқланган жами 365 грамм «Мефедрон» топилган. Моддалар ашёвий далил сифатида олинган.
Тадбир давомида унинг Тошкент туманида вақтинча яшаб турган хонадони ҳам кўздан кечирилган. У ердан яна 734 грамм «Мефедрон», 63 грамм «Альфа-ПВП» ва 45 грамм «Спайс» аниқланган.
Шунингдек, хонадондан иккита электрон тарози, зип-пакетлар ва бошқа ашёлар процессуал тартибда расмийлаштириб олинган.
Хабарда қайд этилишича, мазкур шахс муқаддам ўғирлик билан боғлиқ жиноят учун судланган. Тезкор тадбир маълумотларига кўра, у интернет орқали наркотик сотувчи дўконда моддаларни яширин жойларга қолдириб кетувчи — «закладчик» сифатида фаолият юритган.
Ҳолат юзасидан унга нисбатан жиноят иши қўзғатилган. Тергов ҳаракатлари давом этмоқда.
