Тошкентда ақлли светофорлар ўрнатилиб, йўллар таъмирланмоқда

Йўл ҳаракатини ташкил этиш маркази маълумотига кўра, бу борада шаҳарнинг турли ҳудудларида ақлли светофорлар ўрнатиш, жорий таъмирлаш, йўл чизиқларини янгилаш ва бекатларни реконструкция қилиш ишлари олиб борилган.

Маълум қилинишича, Буюк Ипак йўли йўналишида 28 та светофор устуни ўрнатилган. Шунингдек, 12 та объект ҳудудида 44 та светофор ҳамда 19 та таймер таблоси жойлаштирилган. Бундан ташқари, 19 та анкер блок ўрнатилиб, 400 метр кабел тармоғи тортилган, 11 та светофор бошқарув қутилари монтаж қилинган. Нурафшон, Бобур–Фурқат ҳамда Аҳмад Дониш кўчаларида эса кабел тортиш, таянч устунлари учун чуқурлар қазиш ва кабел канализациясига тайёргарлик ишлари бажарилган.

Пойтахтда жорий таъмирлаш ишлари ҳам бир қатор ҳудудларда олиб борилди. Хусусан, 8 995 квадрат метр майдонда фрезерлаш ишлари амалга оширилган бўлса, 10 157 квадрат метр ҳудудда асфалтлаш ишлари бажарилган. Бу ишлар Бектемир, Мирзо Улуғбек, Чилонзор, Шайхонтоҳур, Юнусобод, Яккасарой, Яшнобод, Олмазор ва Сергели туманларида, шунингдек Марказий кўча бошқармаси тасарруфидаги йўлларда олиб борилган.

Шу билан бирга, Буюк Ипак йўли кўчасида 100 метр тротуар тартибга келтирилди. Йўл чизиқларини янгилаш ишлари доирасида эса жами 7 400 метр масофада чизиқлар чизилди. Бу ишлар Мустақиллик, Абдулла Қодирий, Алишер Навоий, Шаҳрисабз ва Шароф Рашидов кўчаларида амалга оширилган.

Йўл белгилари инфратузилмасини янгилаш доирасида 32 та белги алмаштирилган ва 27 та янги йўл белгиси ўрнатилган. Шунингдек, Буюк Ипак йўли, Махтумқули, Осиё, Мирзо Улуғбек, Истиқлол ҳамда КҲАЙ кўчаларида жами 21 та замонавий бекатни янгилаш ишлари давом этмоқда.

Қўшимча равишда, «Тошшаҳарнур» давлат муассасаси томонидан Махтумқули ва Себзор кўчаларида жами 15 та темир ёритиш устуни бўялган. Мутасаддиларнинг таъкидлашича, бу каби ишлар пойтахтда ҳаракат хавфсизлигини ошириш, транспорт оқимини тартибга солиш ва йўл инфратузилмасини босқичма-босқич замонавийлаштиришга хизмат қилади.