Хоразмда ҳайкални ўпган аёл жаримага тортилди

Сурхондарёда яшовчи аёл Хивага саёҳатга борган. У Ичанқалъадаги ҳайкаллардан бирини ўпиб, тасвирга олган ҳамда ижтимоий тармоқдаги ўз саҳифасига жойлаштирган.

Фото: Видеодан кадр

ЖИБ Хива шаҳар суди Ичанқалъадаги ҳайкаллардан бирини ўпган аёлга маъмурий жазо қўллади. Kun.uz суд ҳужжати билан танишди.

Суд қарорига кўра, Сурхондарё вилоятининг Олтинсой туманида яшовчи 25 ёшли М.Г. саёҳат қилиш учун Хива шаҳрига борган. У 21 феврал куни Ичанқалъадаги Хоразм миллий мусиқа санъати намояндаларига бағишланган ҳайкални ўпиб, тасвирга олган. Сўнгра уни ижтимоий тармоқдаги ўз саҳифасига жойлаштирган.

М.Г. судда айбига иқрорлик билдирган. У қилмишидан пушаймонлигини, ҳомиладор эканини айтиб, суддан енгиллик сўраган.

Суд қарори билан М.Г. Маъмурий жавобгарлик тўғрисидаги кодекснинг 64-1-моддаси 1-қисмида назарда тутилган моддий маданий мерос объектларига нисбатан ҳурматсизлик билан муносабатда бўлиш ҳуқуқбузарлигини содир этган деб топилди. Унга БҲМнинг 5 баравари (2 млн 60 минг сўм) миқдорида жарима жазоси тайинланди.