Ўзбекистонда тадбиркор аёллар учун She’s Next глобал ташаббуси бошланди

Танлов якунида 30 нафар финалчи Тошкентга таклиф этилади. Бу ерда ўтказиладиган лойиҳа тақдимоти (pitching) натижаларига кўра 7 нафар ғолиба ўз бизнесини ривожлантириш учун пул грантлари билан тақдирланади.

Ўзбекистонда аёллар тадбиркорлигини қўллаб-қувватлаш ва ривожлантиришга қаратилган She’s Next глобал ташаббусининг биринчи босқичи бошланди. Лойиҳа Visa компанияси томонидан Ipak Yuli Bank билан ҳамкорликда, Рақамли технологиялар вазирлиги ва аёллар тадбиркорлигини қўллаб-қувватлаш бўйича Hamroh компанияси кўмагида амалга оширилмоқда.

Бугунги кунда аёллар ўртасида тадбиркорликни ривожлантириш барқарор иқтисодий ўсишни таъминлаш ва замонавий бизнес муҳитини шакллантиришнинг муҳим омилларидан бирига айланмоқда.

Ipak Yuli Bank бошқаруви раисининг ўринбосари Турсунбой Махкамов таъкидлаганидек, She’s Next ташаббуси шунчаки лойиҳа эмас, тадбиркор аёлларга билим, ресурслар ва ривожланиш имкониятларига етиб бориш имконини берувчи тўлақонли платформа ҳисобланади.

«Биз Ўзбекистонда аёллар ўртасида тадбиркорлик фаоллиги ортиб бораётганини кўряпмиз ва биз учун бу тенденцияни нафақат қўллаб-қувватлаш, балки уни ривожлантириш учун амалий механизмлар яратиш ҳам муҳим: молиялаштиришдан тортиб таълим дастурларигача. Visa билан ҳамкорлик ва She’s Next ташаббусининг ишга туширилиши бизнинг ESG-стратегиямиз бир қисми ҳамда тадбиркор аёллар билим, ресурслар ва янги имкониятларга эга бўладиган барқарор тадбиркорлик экотизимини шакллантиришга қўшилган ҳиссадир. Ишонамизки, ушбу ташаббус амалий платформага айланади ва кўплаб аёлларга ўз бизнесини ривожлантиришда навбатдаги қадамни қўйишга ёрдам беради», – дейди у.

Ўзбекистондан иштирок этувчи аёллар учун умумий мукофот жамғармаси 22 000 АҚШ долларини ташкил этади. Аризалар 2 апрелдан 24 майгача She’s Next платформасида қабул қилинади.

Ўзбекистонда She’s Next ташаббусининг биринчи босқичи «Boshlang!» шиори остида ўтмоқда. Visa компаниясининг Марказий Осиё бўйича вице-президенти ва минтақавий менежери Санжар Сулейманов таъкидлашича, 2019 йилдан буён мазкур ташаббус бутун дунё бўйлаб аёлларга ўз бизнесини йўлга қўйиш ва ривожлантиришда ёрдам бериб келмоқда.

“Бугун биз ушбу ташаббусни Ўзбекистонда Ipak Yuli Bank билан ҳамкорликда илк бор ишга тушираётганимиздан мамнунмиз. Ўзбекистон — катта ва жадал ривожланаётган бозор бўлиб, кучли тадбиркорлик салоҳиятига эга. Биз тобора кўпроқ аёллар бизнес йўлини танлаётганини кўряпмиз. Шу билан бирга, She’s Next ташаббусининг биринчи босқичини бошлаш доирасида меморандум имзоланиши мамлакатда аёллар тадбиркорлигини қўллаб-қувватлаш йўлидаги муҳим қадам ҳисобланади. Умид қиламизки, бизнинг ташаббусимиз тадбиркор аёлларга ўз ғояларини кенгайтириш, қимматли билимлар олиш ва янги бозорларга чиқиш имконини беради. Ташаббуснинг биринчи босқичи «Boshlang! – Бошлашга жасорат!» шиори остида ўтаётгани ҳам бежиз эмас. Чунки айнан биринчи қадамни қўйишга жасорат кўпинча катта ютуқ ва муваффақиятларга олиб боради”, – дейди Visa компаниясининг Марказий Осиё бўйича вице-президенти ва минтақавий менежери Санжар Сулейманов.

Қандай иштирок этиш мумкин?

Лойиҳада аллақачон бизнес юритиб келаётган ёки ўз ишини очишни режалаштираётган аёллар иштирок этиши мумкин. Иштирокчилар учта йўналишдан бирини танлашлари мумкин:

• Амалдаги бизнес;
• Янги бошланаётган бизнес;
• IT бизнес.

Рўйхатдан ўтган иштирокчилар 4 та видеодарс ва 4 та тестдан иборат таълим дастурини ўтайди. Дастурни муваффақиятли якунлаганлар ўз бизнес-режасини экспертлар комиссиясига тақдим этиш имкониятига эга бўлади.

Tанлов бир нечта босқичда амалга оширилади.

Босқичлар

Сана

Изоҳлар

Рўйхатдан ўтиш

2 апрел – 24 май

She’s Next платформасида аризалар қабул қилинади

Таълим босқичи

25 май – 7 июн

Барча рўйхатдан ўтган иштирокчилар ташаббуснинг 4 та маъруза ва 4 та тестдан иборат таълим қисмига кириш имконига эга бўлади

Бизнес-режаларни топшириш

8 – 28 июн

4 та тестни муваффақиятли якунлаган иштирокчилар бизнес-режаларини эксперт баҳолашига тақдим этади

Эксперт комиссияси

29 июн – 19 июл

Экспертлар ҳар бир тоифадан 10 тадан, жами 30 та энг яхши лойиҳани танлаб олади

She’s Next Pitch Day

“She’s Next Pitch Day” финали 7 август куни Тошкентда бўлиб ўтади. Унда финалга чиққан 30 нафар тадбиркор аёл ўз лойиҳаларини ҳакамлар ҳайъатига тақдим этади. Ҳакамлар қарорига кўра 7 нафар ғолиба ўз бизнесини бошлаш ёки ривожлантириш учун пул грантлари билан тақдирланади.

Ўзбекистонда 2 миллиондан ортиқ аёл тадбиркорлар

БМТнинг 2025 йил апрель ойида эълон қилинган “Ўзбекистонда аёллар тадбиркорлиги: баҳолаш ва тавсиялар” номли ҳисоботига кўра, мамлакатда тадбиркорлик билан шуғулланувчи аёллар сони тахминан 2,1 миллион нафарни ташкил этади. Бу кўрсаткич 2020 йилга нисбатан 7 баробар кўп ҳисобланади.

“Дастурларимизни таҳлил қилганимизда қизлар кўпроқ жараёндан чиқиб кетаётганини кўрамиз. Бу эса уларга қўшимча қўллаб-қувватлаш зарурлигини кўрсатади: фақат билим эмас, ишонч, мотивация ва етакчилик кўникмалари ҳам керак”, – дейди Рақамли технологиялар вазири маслаҳатчиси Камола Собирова.

Реклама ҳуқуқи асосида