Дунёдаги энг бетакрор 10 та кузатув майдончаси

Сўнгги йилларда архитекторлар кузатув майдончаларини фақат панорама томоша қилинадиган нуқта сифатида эмас, балки мустақил санъат асари сифатида яратишга интилмоқда. Шу боис дунёдаги кўплаб кузатув миноралари ўзининг ғайриоддий шакли ва муҳандислик ечимлари билан ҳам машҳур.

Даниядаги Marsk Tower ана шундай иншоотлардан бири ҳисобланади. BIG архитектура бюроси томонидан қурилган 25 метр баландликдаги минора ЮНЕСКОнинг Бутунжаҳон мероси рўйхатига киритилган Вадден денгизи миллий боғи ҳудудида жойлашган. Кортен пўлатидан ясалган иншоот шакли икки қаватли ДНК спиралини эслатади.

Швейцариядаги Titlis Tower эса 1980-йилларда қурилган телекоммуникация минорасини замонавий сайёҳлик объектига айлантириш орқали барпо этилган. Herzog & de Meuron бюроси муҳандислари минорага консол кўринишидаги ҳажмлар ва янги вертикал блокларни қўшиб, саноат услубини Алп тоғлари манзараси билан уйғунлаштирган.

Хитойнинг Тибет ҳудудидаги Nujiang River 72 Turns Canyon Scenic Area кузатув майдончаси эса дарё узра 130 метр баландликда осилиб турган шиша платформаси билан машҳур. Унинг шакли яқиндаги машҳур тоғ серпантинини такрорлайди.

Яна бир Хитой лойиҳаси — The Nomadsʼ Beacon Tower кўл ўртасида ёлғиз турган минора сифатида диққатни тортади. Ёз фаслида сув сатҳи кўтарилганда унга олиб борувчи йўл сув остида қолади ва иншоот гўёки кўл бағрида сузиб турган ёдгорликка айланади.

Хитойдаги Pujiang Platform лойиҳасида эса ер билан уйғунлашган гумбазсимон павилон қурилган. Архитекторлар бино ичида пол ва шифт сатҳини ўзгартириш орқали ташқаридан кўринадиган катта панорамали деразага қарашни янада таъсирчан қилувчи «телескопик» эффектга эришган.

Белгиядаги Westerpunt бетондан қурилган бўлиб, унинг шакли денгиз соҳилидаги қумтепалар релефини такрорлайди. Ҳалқасимон йўлаклар меҳмонларга табиат манзараларини турли нуқталардан томоша қилиш имконини беради.

Мексикадаги Espina кузатув майдончаси тоғ ёнбағри узра чиқиб турган улкан пўлат консоли билан ажралиб туради. Конструкция оғирлиги тош билан тўлдирилган махсус контейнерлар ёрдамида мувозанатда ушлаб турилади.

Нидерландияда қурилган Watchtower Einderheide минораси эса ёғочдан ишланган спиралсимон зинаси ва ўрмон узра очиладиган панорамаси билан машҳур. Иншоот лойиҳаланишида кўчиб юрувчи кўршапалаклар учун ҳам махсус яшаш жойлари назарда тутилган.

Хитойдаги Drifting Stones майдончаси атрофдаги қоятошларга бутунлай уйғунлаштирилган. Унинг том қисми табиий тошларни эслатади, ташқи юзаси эса маҳаллий усталар томонидан қоялар текстурасига мослаб қўлда ишланган.

Швециядаги Observation Tower Kärven эса 140 та ёғоч тўсиндан қурилган гиперболоид шакли билан ажралиб туради. Параметрик моделлаштириш асосида яратилган ушбу иншоот табиат қўйнидаги энг замонавий кузатув минораларидан бири ҳисобланади.

Мутахассисларнинг таъкидлашича, бу каби лойиҳалар замонавий меъморчиликда кузатув майдончаларининг вазифасини ўзгартирмоқда. Энди сайёҳлар нафақат юқоридан очиладиган манзараларни, балки ўша манзарага олиб чиқувчи иншоотнинг ўзига хос меъморий ечимларини ҳам томоша қилиш учун бундай объектларга ташриф буюрмоқда.