Таҳлил маркази рейтингни тузишда қарийб 300 та статистик кўрсаткичдан фойдаланган. Баҳолашда давлат бошқаруви ва жамоат институтлари сифати, иқтисодий муҳит, тадбиркорлик учун шарт-шароитлар, шунингдек, таълим, соғлиқни сақлаш ва инсон салоҳиятини ривожлантириш имкониятлари ҳисобга олинган.
Рейтингда биринчи ўринни Швейцария эгаллади. Мамлакат сўнгги йилларда мунтазам равишда биринчи ёки иккинчи поғонадан жой олиб келмоқда. Иккинчи ва учинчи ўринлардан мос равишда Норвегия ҳамда Ирландия ўрин олган. Норвегия ҳам доимий равишда энг фаровон давлатлар қаторидан жой эгалласа, Ирландия 2021 йилда еттинчи ўринга тушганидан сўнг яна юқори поғоналарга қайтди.
Энг фаровон ўнталикка Европадан ташқари фақат Австралия кира олган. У тўққизинчи ўринни эгаллаган. Рейтингнинг қуйи қисмида эса асосан Африка давлатлари жойлашган бўлиб, сўнгги ўнталикда Афғонистон ҳам мавжуд.
Охирги ўринни Эритрея эгаллади. Бу мамлакат узоқ йиллардан буён энг кам фаровон давлатлар қаторидан ўрин олиб келмоқда. Унинг энг яхши натижаси 2023 йилда қайд этилган бўлиб, ўшанда 156-ўринни эгаллаган. Шунингдек, Нигер ва Чад ҳам рейтингнинг энг қуйи поғоналарида жойлашган.
Россия рейтингда 103-ўринни эгаллаб, Туркия ва Танзания ўртасидан жой олган. Мамлакатнинг энг яхши натижаси 2018 йилда кузатилган бўлиб, ўшанда у 82-ўринга кўтарилган.
Собиқ иттифоқ давлатлари орасида энг юқори кўрсаткич Эстонияга тегишли бўлиб, у 19-ўринни қайд этган. Литва 25-ўрин, Латвия 30-ўрин, Гуржистон 42-ўрин ва Арманистон 43-ўриндан жой олган. Қозоғистон 66-ўринни эгаллаган бўлса, Озарбойжон 105-ўринда, Беларус эса 132-поғонадан ўрин олган.
