Ижтимоий тармоқларда Қашқадарё вилояти Деҳқонобод туманида қурилаётган кўприк балкаси бир томонга оғиб кетгани тасвирланган видео тарқалди.
Автомобил йўллари қўмитаси томонидан берилган изоҳга кўра, воқеа 6 август куни Ислом тараққиёт банки ва OPEK жамғармаси иштирокидаги М-39 Олмаота—Бишкек—Тошкент—Шаҳрисабз—Термиз автомобил йўлининг 1255-1315-километр (60 км) қисмини реконструкция қилиш лойиҳаси объектида қурилиш-монтаж ишлари вақтида юз берган.
Қайд этилишича, янги қурилаётган икки сатҳли қайрилиб олиш сунъий иншоотининг балкалари монтаж қилинаётган вақтда краннинг бир томони олдин кўтарилгани сабаб балканинг иккинчи томонига ортиқча юкланиш кучи тушган ва балка синиб қулаб тушган.
“Кўприк балкаси (айниқса, олдиндан зўриқтирилган бетон балка) йиғиш пайтида ишдан чиқиши мумкин, чунки у дуч келадиган юк шароитлари балка мўлжалланган шароитлардан бутунлай фарқ қилиши мумкин. Балкалар одатда вертикал равишда ишлаш ва ўз оғирлигини шу ўқ бўйлаб ўтказиш учун мўлжалланган. Лойиҳа доирасида қурувчи консултант ташкилот томонидан ҳам ушбу ҳолат тасдиқланган”, дейилади расмий изоҳда.
Ҳодиса оқибатида ҳеч кимга зарар етмаганлиги айтилмоқда. Ҳозирда лойиҳа Муҳандис-маслаҳатчи ташкилоти Temelsu International Engineering Services Inc. компанияси мутахассислари томонидан ҳодиса сабаблари юзасидан ўрганиш ишлари бошланган.
