Visual Capitalist тақдим этган инфографикада Resume.io тадқиқоти асосида 2025 йилда 185 давлатдаги қонун билан белгиланган йиллик ҳақ тўланадиган таътил ҳамда ҳақ тўланадиган давлат байрамлари кунлари таққосланган.
Тадқиқотга кўра, рейтингга киритилган мамлакатларда ходимлар учун йиллик ҳақ тўланадиган таътил ва байрам кунларининг умумий миқдори ўртача 30 кунни ташкил этади.
Рейтингда Эрон етакчилик қилган. Бу мамлакатда йиллик ҳақ тўланадиган таътил ва давлат байрамлари жами 53 кунга етади. Манбада қайд этилишича, Эронда байрам кунларининг кўплиги анъанавий олти кунлик иш ҳафтаси билан ҳам боғлиқ.
Яқин Шарқнинг бошқа давлатлари ҳам юқори кўрсаткичларга эга. Хусусан, Яманда — 45 кун, Баҳрайнда — 44 кун, Кувайтда — 42 кун, Уммонда — 39 кун ҳақ тўланадиган таътил ва байрам кунлари мавжуд.
Бунда рейтингдаги умумий кўрсаткич икки қисмдан — қонун билан кафолатланган йиллик ҳақ тўланадиган таътил ҳамда ҳақ тўланадиган давлат байрамларидан ташкил топади. Шу сабабли бир хил натижа қайд этган давлатларда таътил ва байрам кунларининг нисбати турлича бўлиши мумкин.
Европа давлатларининг аксарияти жаҳон бўйича ўртача 30 кунлик кўрсаткичга тенг ёки ундан юқори натижа қайд этган. Масалан, Исландияда — 40 кун, Швеция, Португалия ва Словакияда эса 35 кундан.
Россияда 2025 йил ҳолатига кўра, умумий кўрсаткич 42 кунни ташкил этган. Шундан 28 куни стандарт асосий ҳақ тўланадиган меҳнат таътили, 14 куни эса давлат байрамларига тўғри келади.
Осиёнинг айрим йирик иқтисодиётларида эса кўрсаткич жаҳон ўртачасидан анча паст. Хусусан, Хитойда — 16 кун, Ҳиндистонда — 18 кун, Японияда — 26 кун қайд этилган.
Тадқиқотда келтирилишича, дунё мамлакатларида қонун билан белгиланган ҳақ тўланадиган таътил ва байрам кунларининг жами миқдори йилига 9 кундан 53 кунгача боради.
