iSeeCars автомобил тадқиқот агентлиги 2026 йилда автомобилларнинг беш йил давомида қанча қиймат йўқотишини таҳлил қилди. Рейтинг 2025 йил мартидан 2026 йил февралигача сотилган, ишлаб чиқарилганига беш йил бўлган 950 мингдан ортиқ ишлатилган автомобил маълумотлари асосида тузилган. Барча нархлар 2026 йилдаги доллар қийматига мослаб қайта ҳисобланган.
Тадқиқотда ҳар бир моделнинг иккиламчи бозордаги ўртача нархи ишлаб чиқарувчи томонидан белгиланган дастлабки тавсия этилган чакана нарх — MSRP билан таққосланган. Автомобил қанчалик кам арзонлаган бўлса, у беш йилдан кейин дастлабки қийматининг шунчалик катта қисмини сақлаб қолган ҳисобланади.
Porsche 718 Cayman энг кам қиймат йўқотди
Тадқиқот натижаларига кўра, энг яхши кўрсаткич Porsche 718 Cayman моделида қайд этилган. У беш йилда дастлабки қийматининг атиги 9,6 фоизини йўқотади.
Пул ҳисобида бу автомобилнинг ўртача 6 988 долларга арзонлашишини англатади. Моделнинг дастлабки тавсия этилган чакана нархи тахминан 72,8 минг долларни ташкил этган.
Иккинчи ўринни Porsche 911 эгаллаган — у беш йилда 11,1 фоиз қиймат йўқотади. Учинчи ўринда Chevrolet Corvette бўлиб, унинг нархи шу даврда 18,7 фоизга пасаяди.
Умуман, спорт автомобиллари нархини энг яхши сақлайдиган моделлар орасида юқори натижа кўрсатган. Рейтингнинг дастлабки етти поғонасидан тўрттасини спорт автомобиллари — Porsche 718 Cayman, Porsche 911, Chevrolet Corvette ва Subaru BRZ эгаллаган.
Бу айрим спорт ва автомобил ишқибозларига мўлжалланган моделлар дастлабки нархи нисбатан юқори бўлишига қарамай, иккиламчи бозорда ўз қийматини ўртача автомобилларга нисбатан яхшироқ сақлаб қолишини кўрсатади.
Toyota моделлари ҳам юқори ўринларда
Нархини яхши сақлайдиган автомобиллар рейтингида Toyota моделлари ҳам салмоқли ўрин эгаллаган.
Хусусан, Toyota Tacoma беш йилда дастлабки қийматининг 19,9 фоизини йўқотиб, рейтингда тўртинчи ўринни эгаллаган. Toyota Tundra эса 21,2 фоизлик арзонлашиш билан бешинчи ўринда қайд этилган.
Умуман, қийматини энг яхши сақлайдиган автомобиллар рўйхатига Toyotaʼнинг еттита модели кирган. Улар орасида пикаплар, йўлтанламаслар, ихчам автомобиллар ва минивэнлар бор. Бу юқори қолдиқ қиймати Toyotaʼнинг фақат битта модели ёки автомобил турига эмас, балки турли сегментлардаги машиналарига хос эканини кўрсатади.
