Владимир Путин 14–15 декабр кунлари Майамида бўлиб ўтадиган G20 саммитига таклиф қилинди, деди АҚШ давлат котиби Марко Рубио журналистларнинг саволларига жавоб берар экан.
«Ўйлаймизки, бу унинг учун нафақат [АҚШ] президенти, балки жаҳон етакчилари билан мулоқот қилиш имконияти бўлади. Умид қиламизки, бу таклиф қабул қилинади», — деди Рубио.
Унинг қўшимча қилишича, «агар фақат ўзингиз рози бўлган одамлар билан учрашсангиз, албатта, бу жуда ёқимли учрашувлар бўлади, аммо муаммоларни ҳал қилиш нуқтаи назаридан ҳеч нарса ўзгармайди». «Муаммоларни ҳал қилиш учун ўзингизга маъқул бўлмаган одамлар билан учрашишингиз керак», — деди давлат котиби.
Москва энергетика соҳасида ўт очишни тўхтатишдан манфаатдорми, деган саволга Рубио шундай жавоб берди: «Ўйлайманки, иккала томон ҳам дон ва энергетикага тааллуқли бўлган қисман ўт очишни тўхтатишга қизиқиш билдирган. Бу уруш муаммосини ҳал қилмайди, лекин менимча, ҳозир сезилаётган баъзи глобал тарангликни маълум даражада юмшатишга имкон беради».
Икки кун аввал Bloomberg Путиннинг Осиё-Тинч океани иқтисодий ҳамкорлик (ОТИҲ) саммити учун Хитойга бормоқчи экани, бироқ G20 саммитини ўтказиб юбориши ҳақида ёзган эди. Агентлик манбалари Путиннинг Флоридадаги саммитда Трампга қўшилиш эҳтимолини «жуда паст» деб атади.
Путин охирги (ва Украинадаги уруш бошланганидан бери ягона) марта 2025 йил 15 августда Аляскада Доналд Трамп билан шахсан учрашган, бироқ бу учрашув ҳеч қандай кўзга кўринарли натижага олиб келмаган.
