АҚШнинг биринчи хоними Мелания Трамп ўз иштирокида Россия босиб олган Олешки шаҳрида эришилган олти кунлик сулҳ «янада мустаҳкам тинчлик»ка олиб келишига умид билдирди. У бу ҳақда 5 ноябр, пайшанба куни Оқ уйда Россия ва Украина вакиллари билан учрашувда гапирди.
«Умид қиламанки, Олешки тажрибаси янада мустаҳкам тинчликка эришиш учун туртки бўлади. Ҳар қандай катта ўзгариш кичик бир учқундан бошланади», — дея Трампнинг сўзларини келтирди AFP агентлиги.
Унинг фикрича, АҚШ иштирокида Россия ва Украина вакиллари «шунчаки вақтинча ўт очишни тўхтатишдан кўра узоқроқ давом этадиган натижага эришиши мумкин».
Трамп Россия президенти Владимир Путин ва Украина президенти Володимир Зеленскийнинг ролини алоҳида таъкидлаб, уларсиз «Олешкида ўт очишни тўхтатиш имконсиз бўлар эди», деди.
«Уларнинг ҳамкорлиги минтақада тинчликни илгари суриш учун муҳим намуна яратмоқда», — деди АҚШнинг биринчи хоними.
У ҳар икки раҳбарга шахсий мактуб ёзганини ва уларни икки мамлакат вакиллари орқали етказишини қўшимча қилди.
Трамп билан учрашувда Лантратова ва Лубинец қатнашди
Оқ уйда АҚШнинг биринчи хоними билан Россия ва Украинадан икки нафардан вакил учрашди.
Москва номидан тадбирда Россиянинг инсон ҳуқуқлари бўйича вакили Яна Лантратова ва президентнинг махсус вакили Кирилл Дмитриев иштирок этди. Киев номидан эса Олий раданинг инсон ҳуқуқлари бўйича вакили Дмитрий Лубинец ҳамда парламентдаги «Халқ хизматкори» фракцияси раҳбари Давид Арахамия қатнашди.
Лубинец АҚШнинг биринчи хонимига Украина президенти Владимир Зеленский бир кун аввал уни тақдирлаган I даражали княгиня Ольга орденини топширди. Дмитриев эса унга Олешкидаги бир қиз чизган, ойна остига рамкага солинган расмни берди.
Олешкида ўт очишнинг тўхтатилиши
Олешки ва шаҳарга туташ ҳудудлардаги сулҳ 27 октябр куни эрта тонгда бошланиб, 1 ноябр куни кечқурун якунланди.
У Мелания Трамп иштирокида томонлар ўртасида эришилган келишувлар натижаси бўлди. Москва ва Киев уни ўт очишни тўхтатишни ташкил этишдаги асосий воситачи деб атамоқда.
