Бангкок шаҳрининг бир неча тумани сўнгги кунларда одатда бутун сентябр давомида бўладиган ёғингарчилик миқдорига тенг ёмғир ёғиши оқибатида сув остида қолди. Таиланд пойтахтидаги асосий каналлардан сув тошиб чиққан, шаҳар канализация тизими эса юкламани кўтара олмаган. Кўчаларни сув босиши оқибатида транспорт ҳаракати тўхтаб қолган, юзага келган вазият олти мингга яқин кишини сув босган уйлардан бошпаналарга кўчиб ўтишга мажбур қилган.
Маҳаллий расмийлар фавқулодда ҳолат эълон қилган. Сентябр ойи ўрталаридан бери давом этган ёмғирлар туфайли юзага келган сув тошқинлари Таиланднинг 41 провинциясига таъсир кўрсатган. Табиий офат оқибатида саккиз киши ҳалок бўлган, 580 мингта уй хўжалиги зарар кўрган. Сув босган ҳудудлардаги 80 мингдан ортиқ киши ўз уйларидан чиқа олмай қолган. Иқтисодчилар мамлакат иқтисодиётига етказилган зарарни камида 11 миллиард батга (327 миллион доллар) баҳоламоқда. Ёғингарчилик ҳамон бутун мамлакат бўйлаб давом этмоқда. Кейинги кунларда Бангкокда ёғин камайиши кутилмоқда. Шаҳарда сув сатҳи пасая бошлаган. Қуйида Таиланд пойтахти кўчаларида сўнгги кунларда кузатилган вазият акс этган суратлар.
