Таиланд Туризм ва спорт вазирлиги Колумбия, Мексика ва Ўзбекистондан келувчи сайёҳлар учун 15 кунлик визасиз режимни жорий этишни режалаштиряпти. Бу орқали виза расмийлаштиришдаги жиддий кечикишларни бартараф этиш ва узоқ масофалардан келадиган сайёҳлар оқимини ошириш кўзда тутилган, дея хабар берди маҳаллий The Nation нашри.
Мазкур ташаббус халқаро авиакомпаниялар дуч келаётган ташкилий муаммолар кучайгани ортидан илгари сурилмоқда. Хусусан, яқинда Emirates авиакомпанияси Таиланд туризм бошқармасига расмий шикоят йўллаган. Шикоятда мексикалик йўловчилар парвоз вақтигача Таиланд визасини олишга улгурмагани сабабли Мексикадан учадиган ҳар бир рейсда ўртача 20 нафардан 30 нафаргача йўловчи рўйхатдан ўта олмагани келтирилган.
Таиланд туризм ва спорт вазири Сурасак Пҳанчароэнворакул Мексика ва Лотин Америкасининг бошқа мамлакатларидан келадиган сайёҳлар визаларни узоқ кутиш муаммосига дуч келаётганидан вазирлик хабардор эканини тасдиқлаган.
«Вазирлик узоқ муддатли ечим сифатида 9 ноябр куни бўлиб ўтадиган Виза сиёсати бўйича қўмита йиғилишига истиқболли Лотин Америкаси ва бошқа мақсадли мамлакатлар, жумладан, Колумбия, Мексика ва Ўзбекистон учун 15 кунлик визасиз киришни маъқуллаш таклифини киритди», — деган у.
Жумладан, ўзбекистонлик сайёҳлар электрон виза олишнинг мураккаб тартибига дуч келган, чунки аризалар фақат Таиланднинг Россиядаги элчихонаси орқали кўриб чиқилган. Бу мураккаб ва узоқ чўзилган жараён маҳаллий туроператорларни Таиланд бўйича саёҳат пакетларини бекор қилиб, Ветнам каби рақобатдош йўналишларни танлашга мажбур қилган.
Бундан ташқари, Лотин Америкасида визаларни кўриб чиқиш ва беришдаги сурункали кечикишлар сабабли мексикалик ва колумбиялик сайёҳлар мунтазам равишда режалаштирилган вақтда саёҳатга чиқа олмаяпти.
Аввалроқ, Таиланд ҳукумати дунёнинг 93 мамлакати, жумладан, Ўзбекистон фуқаролари учун амалда бўлган 60 кунлик визасиз режимни 15 сентябрдан расман бекор қилгани ҳақида хабар қилинганди.
