Оғир атлетика бўйича Ўзбекистон жамоаси аъзоси Акбар Жўраев (-110 кг) кутилганидек Осиё ўйинлари чемпионига айланди.
Аввалига у даст кўтаришда 197 кг билан жаҳон рекордини янгилашга муваффақ бўлди. Бу борада рекорд унинг ўзига тегишли бўлиб турганди (у 2025 йил октябрида Норвегиядаги жаҳон чемпионатида даст кўтаришда 196 кг, умумий 428 кг натижа билан иккита рекорд ўрнатганди).
Кейин эса силтаб кўтаришда биринчи уринишдаёқ 226 кг натижа кўрсатди (Осиё ўйинлари рекорди) ва кейинги уринишларни амалга оширишига ҳожат қолмади. Унинг рақибларидан ҳеч бири уч уринишда ҳам 222 кг натижадан ошира олишмади.
Шу тариқа, у икки кураш ҳисобида 423 кг натижа қайд этди ва бу ҳам Осиё ўйинлари рекорди ҳисобланади.
Маълумот учун, Акбар Жўраев Олимпиада ғолиби, икки карра Осиё чемпиони, уч карра жаҳон чемпиони ҳисобланади, шу билан бирга, бу унинг учун илк Осиё ўйинлари ғолиблиги бўлди – 2022 йил Ҳангчжоуда бўлиб ўтган турнирда у кумуш медал билан кифояланганди.
Унинг олтин медали Ўзбекистон делегациясининг 13-олтинига айланди. Айни вақтда Ўзбекистон 13 та олтин, 17 та кумуш ва 13 та бронза – жами 43 та медал билан умумий рейтингда тўртинчи ўринда бормоқда.
