Испания Хорватияни таслим этди – 4:1. Ламин Ямал мавсум стартида «Барса»да бўлгани каби миллий жамоада ҳам ёрқин ўйин кўрсатмоқда.
2-дақиқадаёқ у «Атлетико» футболчиси Алекс Баэнадан тўпни қабул қилиб олиб, ўз услубида олис бурчакни аниқ нишонга олди. Ямал биринчи турда Англия дарвозасини ҳам 2-дақиқада ишғол этганди.
28-дақиқада хорватлар кутилмаганда мувозанатни тиклади – меҳмонларнинг ўйиндаги биринчи зарбасиёқ омадли чиқди. Кексаликни тан олмаётган Иван Перишич қаторасига иккинчи ўйинда голли ассист муаллифи бўлди – Дион Беле унинг узатмасини бош билан голга айлантирди.
Кўп ўтмай испанлар яна ҳисобда олдинга чиқиб олишди: бу сафар Ямал ўз қанотидан ажойиб узатма берди, Марк Пубил бош билан тўпни дарвоза тўрига жойлаштирди. Танаффусдан кейин Ламин яна бир бор ўз номини таблога ёздириб қўйди: бу сафар у яқин бурчакни аниқ нишонга олди. Голни эса антиқа услубда нишонлаб, тўп устига ўтириб олди. У бундай ҳаракатни Чемпионлар лигасида ҳам амалга оширганди.
Фото: Europa Press via Getty Images
Ушбу 19 ёшли вингер «Барселона»да мавсум стартидаги саккиз ўйинда 8+6 қайд этган. Терма жамоанинг Миллатлар лигасидаги икки ўйинида эса 3+1 натижасини қайд этиб, «Олтин тўп» мукофоти учун ҳақли эканини яна бир бор намойиш этди.
Испаниянинг Севиля шаҳридаги стадионга йиғилган маҳаллий мухлислар шу куни нафақат ўз севимли футболчиларини, балки рақиблар сафида захирадан тушган Лука Модрични ҳам ўрнидан турган ҳолда олқишлашди.
Испания қаторасига 40 ўйинда асосий вақтда ютқазмаяпти ва бу билан ўз рекордини янгилашда давом этмоқда. Ушбу серия 2024 йил мартида бошланганди. Сўнгги мағлубият – Колумбияга қарши ўртоқлик ўйинида бўлган (0:1). Бу даврда Миллатлар лигаси финалида Португалияга қарши кечган ўйинда ҳам испанлар мағлубиятга учраган, аммо ўша ўйиннинг асосий вақтида дуранг натижа қайд этилган ва ғолиб пеналтилар сериясида аниқланган (2:2, 3:5).
Шу куни Ямал Испания миллий жамоаси тарихида бир ўйинда 2+1 натижасига эришган энг ёш футболчи бўлди: у 19 ёш-у 78 кунлик. Бундан олдинги рекорд Раул ва Хосеба Эчеберрияга тегишли бўлиб турганди (иккиси ҳам 21 ёш-у 273 кунлигида шундай натижа қайд этган).
Гуруҳдаги иккинчи ўйинда Англия Чехияни осонлик билан мағлубиятга учратди – 2:0. Чехлар 25-дақиқадаёқ озчилик бўлиб қолишди: Павел Шулц Эллиот Андерсонга нисбатан хавфли подкат ишлатди ва видеотакрордан кейин қоидабузарга қизил карточка кўрсатилди.
Инглизлар бир соатдан ошиқ вақт давомида кўпчилик бўлиб ўйнашганига қарамай, икки гол билан кифояланишди. Биринчиси – класикодаги рақиблар иштирокида уюштирилди. Иккинчи бўлим бошида «Реал» ҳимоячиси Трент Александер-Арнолд тўпни ҳаволатиб жарима майдонига узатди, «Барселона» аъзоси Энтони Гордон эса ҳеч қандай қаршиликка учрамасдан, бошда аниқ зарба берди.
Бу – Трент 2024 йил октябридан буён терма жамоада самарали ҳаракат амалга ошириши бўлди, Гордон эса қаторасига иккинчи ўйинда гол урмоқда.
Ҳарри Кейн ҳам шу куни майдонни голсиз тарк этмади. 69-дақиқада у жарима майдонидан қайтиб чиққан тўпга кучли зарба берди ва тўп ҳимоячи оёқлари орасидан ўтиб, дарвоза тўрига бориб тушди. Бу инглиз ҳужумчиси учун мавсумдаги саккизинчи гол бўлди. Миллатлар лигаси биринчи турида Ҳарри испанлар дарвозасини ишғол этганди (лекин инглизлар ўшанда 2:3 ҳисобида ютқазганди), «Бавария» сафида эса у етти ўйинда 6+1 кўрсаткичини қайд этган.
Биринчи турда Шимолий Македонияга қарши сафардан йирик ғалаба билан қайтган Швейцария иккинчи ўйинда ҳам йирик ҳисобда ғалаба қозонди ва Шотландия дарвозасига ҳам сафарда учта гол йўллади – 3:0. Ўйин масаласи стартдаёқ ҳал бўлди: мезбонлар ҳимоячиси Жек Ҳендри жарима майдонида қўполлик қилди ва ҳакам унга сариқ карточка кўрсатиб, пеналти белгилади. VAR аралашувидан кейин эса фол жарима майдони ташқарисида амалга оширилгани аниқланди ва карточканинг ранги қизилга ўзгариб, жарима зарбаси белгиланди. Меҳмонлар ҳимоячиси Рикардо Родригес эса жарима зарбасидан тўпни тўғри дарвоза тўрига йўналтирди. Шотландлар 12-дақиқадаёқ гол ўтказиб юборишди ва қолган вақт давомида озчилик бўлиб ўйнашига тўғри келди.
Иккинчи бўлимда Швейцария яна бир ҳимоячиси Нико Элведи ҳамда ҳужумчи Зеки Амдунининг голлари эвазига ишни охирига етказиб қўйди. Шу куни Родриес учун жарима зарбаси (ва рақибга қизил) ишлаган Дан Ндойе иккинчи бўлимда икки голли узатма муаллифи бўлди.
Биринчи турда швейцарларга мағлуб бўлган Шимолий Македония Словенияга ҳам ҳеч нарса таслим қила олмади – 2:0. Мезбонлар иккинчи бўлимда урилган голлар эвазига ғолиб чиқишди: Санди Ловрич 55-дақиқада яқин бурчакка қайтариб бўлмас зарба йўллади, 82-дақиқада Алеша Матко қарши ҳужумни гол билан якунлаб, интригага барҳам берди. Словенлар бу ўйинда ҳам гол ўтказишмади – Шотландияга қарши кечган биринчи ўйинда ҳисоб очилмаганди (0:0).
3 октябр. Швейцария – Словения, Шимолий Македония – Шотландия
Беларус ва Финландия ўйинида мухлислар гол кўришмади – 0:0. Беларус нафақат ўз дарвозаси дахлсизлигини сақлаб қолди, балки иккинчи бўлимда рақиб дарвозасини ишғол этишди ҳам. Аммо Александр Селяванинг голи офсайд туфайли бекор қилинди. Қолаверса, «Монако» дарвозабони Лукаш Градецки бир неча вазиятда мезбонларни қутқариб қолди. Беларусликлар сафарда муносиб ҳаракат қилишди ва турнирдаги илк очкосини қўлга киритди.
Ўтган турда Финландиядан 7 та жавобсиз гол ўтказган Сан-Маринони Албанияга ҳам йирик ҳисобда мағлуб бўлди – 3:0. 21-дақиқада яримҳимоячи Анис Меҳмети бурчак зарбасидан кейин ҳисобни очди, Мюрто Узуни эса 27-дақиқада қайтган тўпга биринчи бўлиб етиб бориб, ҳисобдаги фарқни оширди. Иккинчи бўлимда Рей Манай ҳисобни йирик кўринишга келтирди.
Словакия Қозоғистонни ўйин охиридаги гол эвазига таслим этишди – 2:1. Қозоғистонликлар учун сафар ўйини қийин кечди. 26-дақиқада Лео Сауэр амалда бўш дарвозани ишғол этиб, ҳисобни очди, кўп ўтмай Рамазон Каримов жамоасининг ўйиндаги илк зарбасини голга айлантирди. Шундан кейин меҳмонлар ҳисобни ушлаш учун ўйнашди ва тўлиқ ҳимояланишди, аммо 82-дақиқада барибир бурчак зарбасидан гол ўтказиб юборишди.
Исландия Люксембургга ҳеч қандай имкон қолдирмади – 3:0. Биринчи бўлимда Андри Гудйонсен (Эйдер Гудйонсеннинг ўғли) ва Орри Оускарссон боғлами қарши ҳужумларда биттадан гол ва биттадан пас муаллифи бўлишди. Танаффусдан кейин Виктор Паулссон бурчак зарбасидан учинчи голни урди.
Болгария ва Эстония ўйинида эса ҳисоб очилмади – 0:0. Мезбонлар фаолроқ бўлишди ва зарбалар борасида устунлик қилишди (17:6), камида битта голга ҳақли эди, аммо вазиятлардан фойдалана олишмади. Эстонлар қаторасига иккинчи ўйинда дурангга эришди, биринчи турда Исландия билан 1:1 ҳисоби қайд этилганди.
3 октябр. Исландия – Болгария, Эстония – Люксембург
Энди Миллатлар лигасида кичик пауза бўлади – чоршанба оқшомида ўйинлар йўқ, пайшанбадан сериал давом этади ва мухлислар учинчи турнинг биринчи кунида Германия, Португалия ва Норвегия миллий жамоалари ўйинларига гувоҳ бўлишади.
