Францияда бир ҳафтадан буён мактаб ўқувчилари оммавий норозилик намойишлари уюштирмоқда. Намойишлар Париж ташқарисидаги Ил-де-Франсда бошланганди, аммо тезда бутун мамлакат бўйлаб тарқалди. Лицейлар (Франция таълим тизимида катта синф ўқувчилари ўқийдиган мактаблар) ўқувчилари синфхоналар тўлиб тошгани, ўқитувчилар етишмаётгани, ўқув бинолари ёмон ҳолатдалиги ва дарс жадвали жуда тиғиз тузилганидан эътироз билдиришмоқда. Ички ишлар вазирлиги маълумотига кўра, 29 сентябрга келиб бутун Франция бўйлаб 400 дан ортиқ намойишчилар қўлга олинган, уларнинг аксари вояга етмаган ўсмирлардир. Таълим вазирлиги норозилик акциялари мамлакатдаги 3700 га яқин мактабдан бир неча юзтасини қамраб олганини маълум қилган. Айрим йирик шаҳарларда норозилик акциялари мактаб ўқувчиларининг полициячилар билан тўқнашувларига айланган. Айрим ҳолатларда намойишчилар ёнувчи аралашма солинган шишалардан фойдаланган ва полициячиларни тошбўрон қилган. Бунга жавобан полициячилар кўздан ёш сиздирувчи газ қўллаган. «Медуза» Франциянинг турли шаҳарларидаги мактаб ўқувчиларининг намойишлари вақтида олинган фотосуратларни эълон қилди.
