Visual Capitalist инфографикаси Similarweb маълумотлари асосида тайёрланган. Рейтинг компютер ва мобил қурилмалар браузерлари орқали сайтларга ташрифларни ҳисобга олади. Иловалар, API ва бошқа маҳсулотларга ўрнатилган сунъий интеллект функцияларидан фойдаланиш унга киритилмаган.
Шунингдек, рақамлар алоҳида фойдаланувчилар сонини эмас, ташрифлар сонини англатади: бир киши сайтга бир неча марта кириши мумкин.
Сентябр ойида Gemini сайтига 2,6 миллиард марта ташриф буюрилган. Учинчи ўриндаги Claude эса қарийб бир миллиард ташриф қайд этган. Бу DeepSeek, Grok, Copilot ва Perplexity сайтларининг жами кўрсаткичидан ҳам кўп.
ChatGPT ва Gemini биргаликда чат-ботлар сайтларига ташрифларнинг асосий қисмини эгаллаган. Қолган платформалар ҳиссасига умумий трафикнинг бешдан биридан камроғи тўғри келган.
2025 йил октябридан 2026 йил сентябригача бўлган даврда Gemini ва Claude таҳлилдаги йирик чат-ботлар орасида ўз улушини оширган ягона платформалар бўлган. Манбада Gemini ўсиши Google’нинг кенг фойдаланувчилар базаси, Claude’ники эса дастурлаш ва ахборот билан ишлаш имкониятлари ҳамда оммавий танилишининг ортиши билан изоҳланган.
Claude 2025 йил октябрида бешинчи ўринда турган бўлса, энди учинчи поғонага кўтарилган. Шу даврда DeepSeek, Grok, Copilot ва Perplexity’нинг умумий улуши 11,4 фоиздан 8,1 фоизга тушган.
Microsoft Copilot 1,5 фоизлик улуш билан олтинчи ўринни эгаллаган. Бироқ бу кўрсаткич унинг Windows ва Microsoft Office таркибида ишлатилишини қамраб олмайди. Шу сабабли рейтинг чат-ботларнинг барча платформалардаги умумий оммабоплигини эмас, айнан веб-сайтларига ташрифларни акс эттиради.
