Брекет қўйдириш қанча туради?

Билинмайди, оғиз бўшлиғини тирнамайди

Агар икки жағ учун брекет ўрнатилса нархлар 2 баробар ўсмаслиги мумкин. Юқори ва пастки жағлар текшрилиб натижага қараб икки жағ учун умумий сумма айтилади.

Масалан, пастки жағ муоммоли бўлгани учун, ўрнатиш кўп вақт талаб қилади. Юқори жағ нисбатан яхши, кам вақт кетади. Бунда пастки жағ брекети учун 4 млн, юқори жағникига 3 млн тўлайсиз.

Клиникадан нарх сўраганда қуйидагиларни аниқлаштиринг:

1. нарх бир жағ учунми ёки иккала жағ учунми;

2. брекет ўрнатиш ва ечиш хизматлари киритилганми;

3. режали қабуллар алоҳида тўланадими;

4. диагностика ва ретейнер нархга киритилганми;

5. бўлиб тўлаш имконияти борми ва бунда умумий сумма ўзгарадими.

Брекетнинг энг арзон турини танлашдан олдин ортодонтдан айнан сиздаги тиш нуқсонини қайси тизим билан тузатиш мумкинлигини сўранг.

Брекетдан ташқари яна нимага пул кетади?

Брекет ўрнатишдан олдин ортодонт тишлар ва жағнинг ҳолатини текширади. Зарур бўлса, кариесни даволаш, рентген олиш ва бошқа муолажаларни ўтказиш керак.

Даволаш давомида ҳам режали қабуллар, шикастланган қисмларни таъмирлаш ёки алмаштириш учун қўшимча тўлов чиқиши мумкин.

Бу харажатларнинг ҳаммаси ҳар бир беморга керак бўлавермайди. Масалан, тиш олиш фақат шифокор кўрсатмаси бўлса амалга оширилади.

Даволашнинг умумий нархини қандай ҳисоблаш мумкин?

Клиникадан ёзма харажатлар рўйхатини сўранг. Унда қуйидаги босқичлар алоҳида кўрсатилиши керак:

1. Дастлабки кўрик ва диагностика.

2. Тишларни даволаш ва зарур тайёргарлик.

3. Брекет тизимини ўрнатиш.

4. Даволаш давомидаги режали қабуллар.

5. Брекетни ечиш.

6. Ретейнер ва кейинги назорат қабуллари.

Масалан, брекетнинг ўзи 12 млн сўм турса, бу даволаш учун сарфланадиган якуний сумма эмас. Қолган хизматлар алоҳида ҳисобланса, умумий харажат ошади.

Қандай брекет танлаш мумкин?

Брекетлар материали, симни маҳкамлаш усули ва тишнинг қайси томонига ўрнатилишига кўра фарқ қилади.

Материалига кўра

Металл брекетлар. Тишларга махсус қисмлар маҳкамланади ва улардан сим ўтказилади. Металл тизимлар кўп турдаги тиш нуқсонларини тузатишда қўлланади, аммо ташқи кўриниши яққол сезилади.

Керамик брекетлар. Ранги тиш эмалига яқин бўлгани учун камроқ кўзга ташланади. Бироқ қаттиқ материал баъзи ҳолатларда қарши тишларга тегиши ва уларга зарар етказиши мумкин. Бундай хавфни ортодонт баҳолайди.

Сапфир брекетлар. Шаффоф сунъий кристаллдан тайёрланади. Улар ташқи кўринишга камроқ таъсир қилади, аммо нархи юқорироқ бўлиши мумкин.

Пластик брекетлар. Полимер материалдан тайёрланади. Уларнинг нархи ва самарадорлиги бўйича ишончли, бир хил шартларда таққосланадиган маҳаллий маълумот топилмагани учун бу мақолада алоҳида нарх берилмайди.

Брекет материалининг ўзи даволаш тезлигини белгиламайди. Муҳими тишларнинг дастлабки ҳолати, нуқсоннинг мураккаблиги ва даволаш режаси.

Сим қандай маҳкамланади?

Резинкали брекетда сим ҳар бир брекетга резинка ёки ингичка сим билан маҳкамланади. Бу қисм лигатура деб аталади. Шифокор режали қабулларда сим ва маҳкамлагичларни текширади.

Қулфли брекетда сим махсус қулф ёрдамида маҳкамланади. Шу сабабли уни ушлаб туриш учун алоҳида резинка керак эмас. Бу тизим режали қабулларнинг сонини ҳар бир беморда автоматик равишда камайтирмайди: қабул оралиғини ортодонт белгилайди.

Брекет тишнинг қайси томонига қўйилади?

Ташқи брекет (вестибуляр) тишларнинг олд юзасига ўрнатилади ва кўриниб туради.

Ички брекет (лингвал) тишларнинг тил томонидаги юзасига ўрнатилади. У ташқи томондан кўринмайди, аммо дастлаб тилга халақит бериши ва тишларни тозалашни қийинлаштириши мумкин.

Брекет ўрнатиш ва парвариш

Брекетдан олдин қандай тайёргарлик керак?

Ортодонт аввал тишлар ва жағнинг ҳолатини текширади. Кейин даволаш режасини тузади ва қайси текширувлар кераклигини белгилайди.

Тайёргарлик қуйидагиларни ўз ичига олиши мумкин:

1. кариесни даволаш;

2. панорамали рентген — барча тишларни битта суратда кўрсатади;

3. телерентгенограмма (ТРГ) — бош суягининг ён томондан олинган рентген сурати;

4. мураккаб ҳолатларда 3D томография;

5. тишларни профессионал тозалаш;

6. шифокор зарур деб топса, айрим тишларни олиш.

Барча беморларга бир хил текширувлар талаб қилинмайди. Масалан, 3D томографияни ҳаммага олиш шарт эмас. Зарур текширувларни ортодонт клиник ҳолатга қараб белгилайди.

Брекет қандай ўрнатилади?

Шифокор тишларни тозалайди ва қуритади, ҳар бир тишга брекетни махсус материал билан маҳкамлайди. Кейин брекетлар орқали сим ўтказади.

Ўрнатиш вақти тизим тури ва клиник ҳолатга боғлиқ. Муолажадан кейин тишларда босим ёки оғриқ сезилиши мумкин. Ёноқ ва тил брекетга ишқаланиб, оғиз ичида яра пайдо бўлиши ҳам мумкин.

Дастлабки кунларда юмшоқ овқат танлаш қулайроқ бўлади. Ёнғоқ, қотган нон, ириска ва сақич каби қаттиқ ёки ёпишқоқ маҳсулотлар брекет қисмларига зарар етказади.

Агар брекет бўшашса ёки тушиб кетса, уни ўзингиз маҳкамлашга уринманг. Ортодонтга боринг. Оғриқ бир неча кундан кўпроқ давом этса ёки кучайса ҳам шифокорга мурожаат қилинг.

Брекетли тишларни қандай тозалаш керак?

Брекет атрофида овқат қолдиқлари осон тўпланади. Шунинг учун тишларни мунтазам тозалаш ва ортодонт тавсия қилган воситалардан фойдаланиш муҳим. Брекет ўрнатилгандан кейин ортодант тишни қандай тозалаш кераклигини тушунтиради.

Бу воситаларнинг ҳаммаси ҳар бир беморга шарт эмас. Қайси бири кераклигини ортодонт билан маслахатлашган холатда танланг.

Натижа қачон кўринади ва ретейнер нима учун керак?

Брекет билан даволаниш кўпинча бир йилдан икки йилгача давом этади, аммо айрим ҳолатларда узоқроқ вақт талаб қилиниши мумкин.

Брекет ечилгандан кейин тишлар аввалги ҳолатига силжиши мумкин. Шунинг учун ортодонт ретейнер — тишларни янги ҳолатида ушлаб турувчи мослама тавсия қилади.

Ретейнер икки хил бўлиши мумкин: тишларнинг орқа томонига маҳкамланадиган ингичка сим ёки ечиб-тақиладиган шаффоф мослама. Қайси тури мос келиши ва уни қанча вақт тақиш кераклигини шифокор белгилайди. Айрим беморларга ретейнерни узоқ муддат ишлатиш тавсия қилинади.

Ретейнер учун ўртача 500 мингдан 2 млн сўмгача бўлган нарх кўрсатилган. Бу нарх мослама тури, жағлар сони ва клиникага боғлиқ.

Ёдда тутинг

1. Нархни аниқлаштиринг. Бир жағга ўрнатиш нархи билан тўлиқ даволаш курсини фарқланг.

2. Тўлиқ смета сўранг. Диагностика, режали қабуллар, брекетни ечиш ва ретейнер харажатларини ҳам ҳисобга олинг.

3. Брекетни фақат кўринишига қараб танламанг. Қайси тизим мос келишини ортодонт билан муҳокама қилинг.

4. Тишларни тозалашга тайёр бўлинг. Брекет атрофидаги жойларни ҳар куни тозалаш керак.

5. Ретейнерни унутманг. Брекет ечилгандан кейин натижани сақлаш учун уни тақиш режасига амал қилинг.