ITER халқаро тажрибавий термоядро реакторида массаси 330 тонна бўлган ўта ўтказувчан магнитлардан бирининг кенг кўламли синов дастури якунланди. Ишлар давомида мутахассислар магнит орқали 34 килоампер кучга эга электр токини муваффақиятли ўтказди. Шундан сўнг улкан конструкция магнитларни паст ҳароратда синовдан ўтказиш мажмуасидан чиқарилди.
D шаклидаги 17-рақамли тороидал ғалтак −269°C гача совитилди. Кейин у номинал иш токи — 68 килоампернинг ярмига тенг токда синовдан ўтказилди. Синовларнинг муваффақиятли якунланиши муҳандисларга электромагнит юкламалар таъсирида магнитнинг қандай деформацияланишини баҳолаш ва унинг амалдаги ҳолатини мустаҳкамликни ҳисоблаш моделлари натижалари билан таққослаш имконини берди.
Ғалтак синов мажмуасидан махсус ташиш рамасига кўчирилди. Энди у вақтинча сақлашга юборилади, кейин эса ITER'нинг монтаж биносига етказилади. У ерда ғалтак плазма камерасининг якуний секцион модулларидан бирига ўрнатилади.
Олинган натижалар ва амалий тажриба ITER'нинг яхлит магнит тизимини комплекс синовларга тайёрлашда катта аҳамиятга эга.
Магнитларни паст ҳароратда синовдан ўтказиш мажмуаси ITER'нинг ўта ўтказувчан магнитлари ҳамда уларнинг ишлашини таъминловчи тизимларни бевосита токамакка ўрнатишдан олдин текшириш учун ташкил этилган. Бундай тизимлар қаторига криоген ускуналар, вакуум тизимлари, электр таъминоти манбалари, электр кириш қурилмалари ва бошқарув тизимлари киради.
ITER'нинг тороидал магнитлари реактор ичида ўта юқори ҳароратли плазмани ушлаб туришда асосий ўрин тутади. Лойиҳада D шаклидаги 18 та тороидал ғалтак, олтита полоидал ғалтак ва марказий соленоиддан фойдаланиш кўзда тутилган. Улар биргаликда термоядро тажрибаларини ўтказиш учун зарур магнит майдонларини ҳосил қилади ва бошқаради.
Паст ҳароратдаги дастлабки синовлар дастури эҳтимолий муаммоларни магнитлар реакторга ўрнатилишидан олдин аниқлашга қаратилган. Бу қурилмани ишга тушириш босқичида ва ундан кейинги фойдаланиш даврида техник хавфларни камайтириш имконини беради.
