9 ноябрь куни ижтимоий тармоқларда тарқалган видеода ўзини «Имарат» объектларида ишлаган усталар сифатида таништирган кишилар бажарган ишлари учун ҳақ тўланмаганини айтади. Уларнинг сўзларига кўра, улар қурилишда монтаж ва пол ётқизиш ишларини бажарган, бироқ меҳнат ҳақларини ҳанузгача олмаган.
Видео қаҳрамонларидан бири актриса Шаҳзода Муҳамедовага мурожаат қилиб, уни турмуш ўртоғи учун эмас, балки ҳақини ололмаётган ишчилар учун ҳам йиғлашга чақирган.
«Шаҳзода Муҳамедова эри учун йиғламасин, келиб мана бу ерда етим-есирларнинг ҳаққи учун йиғласин. Пули берилмаган усталар учун йиғласин. Минглаб халқ азоб кўряпти», — дейди у.
Видеони тарқатган шахс ҳам можародан жабр кўрганлар орасида актрисага ишониб, уй харид қилганларнинг аксарияти аёллар эканлигини таъкидлаган. Унинг фикрича, мавжуд бўлмаган уй-жой учун фақат машҳур инсон реклама қилгани сабаб пул тўлаш хавфли эканини бу воқеа яна бир бор кўрсатмоқда.
Эслатиб ўтамиз, аввалроқ «Имарат Development» раҳбариятига нисбатан фирибгарлик ва ваколатни суиистеъмол қилиш билан боғлиқ жиноят иши қўзғатилгани хабар қилинганди. Иш доирасида компания раҳбари Марат Ҳамдамовга нисбатан қамоқ эҳтиёт чораси қўлланган. Харидорлар компания билан тузилган шартномаларда кўрсатилган муддатларда хонадонлар топширилмагани ва пулларини қайтариб олишда муаммоларга дуч келганини билдирган.
Можаро ортидан компания амбассадори бўлган актриса Шаҳзода Муҳамедова ҳам видеомурожаат билан чиқиб, ўзини ҳам ушбу вазиятда жабрланган томон сифатида кўрсатганди.
Тошкент шаҳар прокурори Анвар Ўрмонов ва ИИБ мутасаддилари ҳолат юзасидан фуқаролар билан учрашув ўтказиб, «Имарат» компанияси лойиҳаларига пул тўлаган харидорларга шартномалари билан келиб, ариза ёзишлари кераклигини билдирган.
