Трамп Россия томонда
АҚШ президенти Доналд Трамп Украинадаги уруш масаласида энди тўлалигича Россия томонга ўтди. Киев Россия нефт заводларига зарба бермаслик талабини рад этгач, у Киевга бутунлай қарши бўлиб қолди. «Украина янги лидер танлаши кераклиги, Зеленский билан келишиб бўлмаслигини» ҳафта давомида бир неча марта такрорлади. Кейин интервю бериб, «Зеленский АҚШ бирга ишлашни хоҳлайдиган одам эмас», деди. Путин билан телефонда гаплашиб, АҚШ Россиядан «солярка» сотиб олиши бўйича келишувга эришди, Москвадан бу борада санкцияларни олиб ташлади.
Бу ҳали ҳаммаси эмас. Украина армияси ишлатаётган Starlink терминаллари тезлиги пасайтириб қўйилди, оқибатда украинлар фронтда жиддий муаммога дуч келди. Бу чеклов ортида Трамп билан яна дўстлашиб олган Илон Маск тургани айтилди, лекин миллиардер ҳарбий терминаллар тезлигини Пентагон назорат қилишини айтди. Журналистлар кейинроқ бу борада буйруқ Оқ уйдан келганини аниқлади.
Америка Украинага Россия зарбалари ҳақида разведка маълумотлари бермай қўйди. Шу сабаб русларнинг одатдагидан кўпроқ зарбалари нишонга бориб урилди. Америкадан кейин ғарблик бошқа иттифоқчилар ҳам разведка маълумотлари беришни тўхтатган кўринади, фақат Канада ўз маълумотларини бўлишгани аниқ. АҚШ урушга алоқадор бошқа масалаларда ҳам Киевга разведка маълумотлари беришни тўхтатган.
Сенатор Грэм номи билан аталган «Россияга қарши жаҳаннам санкциялари» тўғрисида қонун эсингизда бўлса керак. Ҳужжат Конгрессдан эсон-омон ўтганди, лекин Трамп ундаги чекловларни камайтиргани аниқ бўлди. Масалан, Россия нефтини сотиб олганларга 100 фоиз, Россия товарларининг ўзига 500 фоиз бож қўйилмайдиган бўлди.
Трамп бир вақтлар айнан Зеленский билан мулоқотдан кейин бошланган импичмент можаросини унутгани йўқ. Мана, энди Украинага қарши хоҳлаган ишини қилмоқда. Россия фойдасига янгидан-янги қарорлар чиқса ҳам, ажабланманг.
Путин: «Биз жавоб берамиз»
Россия президенти Путин илк марта Укриананинг WB омборлари, Yandex дата-марказларига зарбаларига муносабат билдирди. «Душманнинг ҳам WB, ҳам Оzon платформаларига нисбатан ҳаракатларига дуч келдик. Дарвоқе, улар доим шундай қадамларни ташлайдиларки, очиғини айтганда, биз буларни олдиндан кўра билишимиз керак эди. Аммо бу даражагача боришмайди деб ўйлагандик», деди Путин.
Россия президенти «Украина бошлаганидан кейин руслар ҳам жавоб бериб, Украинадаги шундай нишонларни урганини» айтди. Шу ерда қизиқ бир жиҳат бор. Россия аслида Украинадаги дата-марказларга аввалроқ зарба берганди, ўзи бу давлатда рус ракетаси етиб бормаган қанақадир объект қолмади ҳисоб. Лекин Украинанинг WB, Yandex'га зарбалари катта шов-шув бўлди. Шунчалик каттаки, Россия президенти «Энди ўзингиздан кўринг, биз янаям кучли зарба берамиз», деб чиқяпти. Ваҳоланки, руслар учун Украина дата-марказларини нишонга олиш янгилик ҳам, муаммо ҳам эмас.
