Янги 9\11?
Ҳафта давомида дунё яна 2001 йил 11 сентябрни эслаб, бир лаҳза шокка тушди. Flydubai авиакомпаниясига тегишли Boeing 737 МАХ самолёти Дубайдан Тел-Авивга исроилликларни олиб кетаётганда, кескин пастлаб, ерга «самолётни эгаллашга уриниш бўлгани» ҳақида сигнал юборди. Исроил тезда қирувчи самолётларини осмонга кўтариб, самолётни қидиришга киришганда, борт билан алоқа тикланди.
Маълум бўлишича, ўмонлик иккинчи пилот ҳиндистонлик кема капитанига пичоқ билан ҳужум қилиб, уни ўлдирмоқчи бўлган ва ҳаво кемаси бошқарувини қўлга олишга уринган. Бироқ капитан қаршилик қилиб, қонга беланган ҳолатида кабинани очиб юборишга эришган. Жанжал шовқинини эшитиб, эшик олдида турган йўловчилар тезда ичкарига кириб, капитанни ўлдиришга уринган учувчини зарарсизлантирган.
Иккинчи учувчи бошқарув қурилмасини ишдан чиқаришга уринган. Самолётда авиакомпаниянинг меҳнат сафарига кетаётган бошқа учувчилари бўлган ва улар бошқарувни қўлга олиб, кескин пастлаш сабаб дум қисмига зарар етган учоқни Саудия Арабистонидаги Табук аэропортига қўндирган.
Кейинчалик йўловчилар Flydubai'нинг эвакуация рейси орқали Тел-Авивга олиб кетилди. Исроил ҳодисани терактга уриниш деб баҳолади. БАА прокуратураси ҳам бу самолётни олиб қочиш ва терактга уриниш бўлгани ҳақида расман эълон қилди. Иккинчи пилот Саудия Арабистонидан БААга тергов учун олиб кетилган.
Яманда нима гап?
Ямандаги вазият кескинлигича қолмоқда. Ҳукумат Эрон қўлловидаги ҳусийчилар шиалар гуруҳига қарши кураш учун умуммиллий сафарбарлик эълон қилди. Чунки «Ансораллоҳ» мамлакатнинг энг стратегик нуқтаси Боб ал-Мандаб бўғози соҳилларини эгаллаш учун катта қадамлар ташлади. Унга туташ соҳиллар, баъзи оролларни назоратга олди. Етмаганига ҳукумат кучларини қўлловчи Саудия Арабистонига тўғридан-тўғри зарбалар берди. Ҳозирча Саудия бунга қарши нимадир қилгани йўқ, лекин ҳусийчилар «уларга қарши катта ҳужум тайёрланаётгани»ни айтмоқда.
Мадинага дрон ҳужуми
29 сентябр тонгда Арабистондаги муқаддас Мадина шаҳридаги Таибаҳ электр тақсимлаш станциясига дрон урилиб портлаш содир бўлди. Саудия томони ҳужумда Яман ҳусийчиларини айблади, лекин шиалар гуруҳи бу айбловни кескин рад этиб, «улар ислом оламининг муқаддас шаҳарларига ҳужум қилмаслигини» билдирди.
Бу станция мусулмон оламининг икки муқаддас манзилидан бири Масжидул Набавияга электр узатадиган иншоотлардан бири экани мусулмонларда қаттиқ хавотир уйғотди. Интимоий тармоқлардан фикрлардан билиш мумкинки, дунёдаги аксар мусулмонлар бу ҳусийчилар ҳужуми эканига ишонмаяпти. Аввалроқ Саудия томони «ҳусийчиларнинг Макка томон учаётган дрони уриб туширилганини» айтган, гуруҳ бу айбловни ҳам рад этганди. Балки бу чиндан икки муқаддас шаҳарга ҳужум қилинаётганига урғу бериш орқали амалга оширилаётган ахборот урушидир.
