Лионел Месси ва Криштиану Роналду янги таъсис этилган «Барча даврларнинг Олтин тўпи» (Ballon d’Or of All Time, B.O.A.T.) мукофотига номзодлар қаторидан жой олди. Даъвогарлар рўйхати 20 октябрь куни эълон қилинди. Португалиялик ва аргентиналикдан ташқари, рўйхатда Алфредо Ди Стефано (Испания), Йоҳан Кройф (Нидерландия), Франц Беккенбауэр (Германия), Кевин Киган (Англия), Карл–Ҳайнц Румменигге (Германия), Мишел Платини (Франция), Марко ван Бастен (Нидерландия) ва бразилиялик Роналдо ҳам бор.
Рўйхатга кимлар кириши мумкин?
France Football мезонларига кўра, «Олтин тўп»ни камида икки марта қўлга киритган футболчиларгина янги совринга номзод бўлиши мумкин. Шу сабабли рўйхатда Пеле ва Диего Марадона йўқ. Бу 1995 йилгача мукофот фақат европалик футболчиларга топширилгани билан изоҳланади.
Рўйхатдан ўн киши жой олди. Мессининг ҳисобида саккизта, Роналдуда эса бешта «Олтин тўп» бор. Беккенбауэр, Платини, Кройф, ван Бастен ва бошқалар бу мукофотни икки-уч мартадан қўлга киритган.
Овоз бериш жараёни ва унинг ўзига хос жиҳатлари
Таъкидланишича, мукофот соҳиби мухлислар овози билан аниқланади. Мухлисларнинг сўзларига кўра, ҳар бир овоз учун 1 евро тўлаш керак. Берилган овоз эвазига иштирокчи «Олтин тўп» ғолибининг юқори сифатли рақамли фотосуратига эга бўлади. Шунингдек, овоз берувчилар ўртасида 2027 йилги тақдирлаш маросимига иккита чипта ўйналади.
