DW хабарига кўра, компания бу ҳақда LinkedIn саҳифасида маълум қилган. 22 октябр куни бир қатор ОАВ ушбу натижага эътибор қаратган.
Quantum Systems’нинг таъкидлашича, синовни мустақил экспертлар кузатган. Қайд этилган тезлик GPS маълумотлари ва дроннинг борт қайдлагичи ёзувлари билан тасдиқланган.
Шунга қарамай, натижа ҳозирча расмий рекорд ҳисобланмайди. Бунинг учун Apex Recordhunter қарама-қарши йўналишда ҳам парвоз қилиши лозим. Иккинчи синов шамолнинг тезликка эҳтимолий таъсирини ҳисобдан чиқаришга хизмат қилади. Компания бундай парвозни яқин вақтда ўтказишини билдирган.
Quantum Systems июнь ойида ҳам шу дрон соатига 699 километр тезликка эришганини эълон қилган эди. Янги натижа аввалгисидан 78 км/соат юқори.
Июн ойидаги хабарда тажриба аппаратига Porsche автоконцернининг шуъба тузилмаси — V4Smart компанияси аккумулятори ўрнатилгани айтилган. Бироқ рекордчи дрон бир марта қувватланиш билан қанча масофа уча олиши ҳозирча очиқланмаган.
Quantum Systems 2015 йилда ташкил этилган бўлиб, бош қароргоҳи Бавариядаги Гилхингда жойлашган. Унинг асосчиларидан бири — Германия қуролли кучларининг собиқ офицери ва ҳарбий учувчи Флориан Зайбел.
Компания дастлаб қишлоқ хўжалигида фойдаланиш учун учувчисиз аппаратлар яратишга ихтисослашган. DW маълумотига кўра, Россиянинг Украинага кенг кўламли ҳужумидан кейин у ҳарбий йўналишга эътиборини кучайтириб, Киевга Россиянинг Shahed дронларини тутиб қолишга мўлжалланган аппаратларни етказиб бера бошлаган. Компания Украинада ҳам дрон ишлаб чиқаришни йўлга қўйган.
Юқори тезлик тутувчи дронлар учун муҳим хусусият ҳисобланади: улар ҳаводаги нишонга етиб олиши керак. Бироқ Apex Recordhunter тажриба аппарати бўлиб, хабарда унинг ўзи Украинага етказилаётгани ёки жанговар вазифаларда қўлланаётгани айтилмаган.
