UzAuto Motors ўзининг энг харидоргир маҳсулоти – Cobalt автомобили ишлаб чиқаришни кўпайтирди, лекин бу моделнинг ички бозордаги сотувларида сезиларли қисқариш кузатилмоқда.
Статистика қўмитаси маълумотига кўра, 2026 йилнинг биринчи ярим йиллигида 82 951 та Cobalt ишлаб чиқарилган. Бу – ўтган йилнинг мос давридаги кўрсаткичдан 9,8 мингтага ёки 13,5 фоизга кўп:
Шу билан бирга, “Ўзавтосаноат” тақдим этган сотувлар статистикасига қараганда, жорий йил биринчи ярмида UzAuto Motors ички бозорда 40 936 та Cobalt сотган. Бу – юқорида келтирилган ишлаб чиқариш ҳажмининг бор-йўғи 49 фоизини ташкил этади. Қолган ҳажм экспортга йўналтирилган ва/ёки омборларда ўз харидорини кутаётган бўлиши мумкин.
Сотувлар ҳажмини ўтган йилнинг биринчи ярми билан таққослаганда, жорий йилда Cobalt'нинг ички бозордаги сотуви 39 фоизга қисқарганини (67 580 тадан 40 936 тага, минус 26 644 дона) кўриш мумкин.
Расмий статистикага кўра, Ўзбекистон январ-июн ойларида 130,4 мл долларлик автомобиллар экспортини амалга оширган, бу кўрсаткич бир йил олдингидан 5 фоизга кам. Статистика қўмитаси ҳам, “Ўзавтосаноат” ва UzAuto Motors ҳам автомобиллар экспортининг физик ҳажми ва моделлари кесимида маълумот эълон қилмайди.
Қозоғистонда Chevrolet сотувлари 32 фоизга ошди
Шу билан бирга, UzAuto Motors'нинг асосий экспорт бозори бўлмиш Қозоғистонда жорий йил Chevrolet сотувлари кескин ошган. Қозоғистон автомобил уюшмаси маълумотларига кўра, 2026 йил биринчи ярим йиллигида бирламчи автомобил бозорида Chevrolet сотувлари 32 фоизга ошиб, 17 586 тага етган. Шундан 16 370 таси Cobalt ҳиссасига тўғри келади.
Бу кўрсаткич билан Chevrolet Қозоғистонда энг кўп сотилаётган автомобиллар рейтингида етакчилик қилмоқда. Иккинчи ўриндаги Hyundai сотувлари жорий йилда 28,6 фоизга қисқариб, 17 247 тага тушиб қолган (шундан 8601 таси – Hyundai Tucson). Учинчи ўринни 12 332 та сотув (+8,9 фоиз) билан Kia эгаллаб турибди (энг кўп Kia Sportage сотилган – 5200 та).
