Ericsson Yevropada ham Apple’ga qarshi da'vo arizasi berdi

Ericsson kompaniyasi Apple korporatsiyasi o‘zining iPhone va iPad qurilmalarida shved ishlab chiqaruvchisining texnologiyalaridan foydalangani uchun unga lisenzion badallar to‘lashi kerakligini ta'kidlab, unga qarshi Yevropada sud ta'qibini boshladi.

The Financial Times nashri Ericsson bergan bayonotga asoslanib xabar berishicha, kompaniya dastlab Apple bilan tinch kelishib olishga urinib ko‘rgan, biroq bundan naf chiqmagach, korporatsiya ustidan Germaniya, Britaniya va Gollandiya sudlariga da'vo arizasi topshirgan.

“Apple korporatsiyasi Ericsson’ning texnologiyalaridan amaldagi litsenziyaga ega bo‘lmay turib, ulardan foyda olishda davom etmoqda. Bizning texnologiyalar ko‘plab zamonaviy aloqa qurilmalarida ishlatiladi. Biz Germaniya, Britaniya va Gollandiya sudlari bu masalani haqqoniy hal qila oladi, deb ishonamiz”, deb aytdi Ericsson’ning intellektual masalalar bo‘yicha direktori Qosim al-Falahiy.

Agar Yevropa sudlari Apple’ni o‘zining smartfon va planshetlarida Ericsson patentlaridan noqonuniy foydalanayotganlikda aybdor deb topsalar, bu qurilmalarning ushbu hududlarda sotilishi cheklab qo‘yilishi mumkin. Shikoyatlarda gap 2G va 4G aloqa texnologiyalari, yarimo‘tkazgichli butlovchi qismlar va simsiz aloqa haqida ketmoqda. 

Ericsson 2015 yilning boshida Apple’ning ushbu ishga aloqador gadjyetlarini sotishni taqiqlashni talab qilib, AQSh sudi va Xalqaro savdo komissiyasiga da'vo arizalari yuborgan. Apple shved ishlab chiqaruvchisi chipning narxidan emas, balki mobil qurilmaning narxidan kelib chiqib juda katta badallar so‘rayotganini ta'kidlamoqda. Kaliforniyalik gigant o‘zining bu fikrini AQShda Ericsson’ga qarshi sudga bergan da'vo arizasida bayon qilgan.