Qozog‘istonda yo‘lovchi samolyotda yong‘in chiqdi

Qozog‘istondagi Oqtov shahri aeroportida SCAT aviakompaniyasining Boeing-737 samolyotida o‘t chiqdi. Bu haqda Forbes.kz nashri xabar bermoqda.

Hodisa oqibatida hech kim jabrlanmagan. Yong‘inning sabablari aniqlanmoqda. Olov texnik xizmat ko‘rsatish chog‘ida, yo‘lovchilar va yuklar tushirilganidan so‘ng ro‘y bergan.

Yong‘in chiqishidan oldin yo‘lovchilar portlash ovozini eshitgan – bu kislorod ballonining yorilishi natijasi bo‘lishi mumkin. Ballondan sizib chiqqan kislorod olov olib, samolyot qoplamasini teshib o‘tgan bo‘lishi mumkin. Bunday holat ballonlar o‘rnatish qoidalarining buzilishi oqibatida kelib chiqishi mumkin.

Yong‘in 80 m kvadratni qoplagan. Samolyot qayta tiklab bo‘lmaydigan ahvolga kelgan.