Klaudio Markizio Tevesga yangi jamoasida omad tilab qoldi

Argentinalik futbolchi Karlos Teves “Yuventus”dan ketayotgani haqida rasmiy ma'lumotlar berilmaganiga qaramasdan, ba'zi futbolchilar va mutaxassislar o‘yinchi bilan xayrlashmoqdalar va bundan afsusda ekanliklarini bildirmoqdalar.

Avvalroq “Yuventus” rahbariyati vakili Pavel Nedved Tevesning klubdan ketishi katta yo‘qotish bo‘lishini aytgan edi. Endi bo‘lsa Teves bilan klub yarimhimoyachisi Klaudio Markizio tvitter orqali xayrlashmoqda.

“Omad tilab qolaman. Senga fantastik ikki yil uchun minnatdorman. Biz g‘alabalar nashidasini ham, mag‘lubiyatlar alamini ham birga totdik. Sen men uchun doimo o‘rnak bo‘lib qolasan, chempion”, deb yozdi Markizio.

Karlos Teves yangi mavsumni Argentinaning “Boka Xuniors” klubida davom ettirishining katta ehtimoli mavjud.