Toshkentda Devis Kubogi o‘yinlari o‘tkaziladi

17-19 iyul kunlari Toshkentda Devis Kubogi ikkinchi raundining Osiyo va Okeaniya mintaqasi birinchi guruhi doirasida O‘zbekiston va Koreya terma jamoalari o‘rtasidagi bahslar bo‘lib o‘tadi.

O‘zbekiston tennis fedaratsiyasining xabar qilishicha, g‘olib jamoa Jahon ligasiga chiqish o‘yinida ishtirok etish huquqini qo‘lga kiritadi.

Xalqaro jamoa turniri doirasida O‘zbekiston va Koreya besh marta uchrashgan. O‘zbekiston 4:1 hisobi bilan oldinda bormoqda. Oxirgi bahs 2010 yili Koreya kortlarida o‘tkazilgan bo‘lib, unda o‘zbekistonlik sportchilar 3:2 hisobida g‘alaba qozongan edi.

Ushbu mavsumda O‘zbekiston termasi birinchi turni o‘tkazib yubordi. Koreyalik tennischilar esa Tailandda mehmon bo‘lib, mahalliy jamoani 3:2 hisobida mag‘lubiyatga uchratishdi.

Qur'a tashlash marosimi 16 iyul kuni bo‘lib o‘tadi. O‘yinlar Respublika olimpiya zaxiralari tennis maktabi kortlarida o‘tkaziladi.