Shotlandiyaning Glazgo shahrida suzish bo‘yicha paralimpiyachilar o‘rtasida jahon chempionati o‘tkazilmoqda. Xalqaro paralimpiya qo‘mitasi hamda Xalqaro suzish federatsiyasi shafeligida o‘tkazilayotgan mazkur dunyo birinchiligida jahonning ko‘plab yetakchi sportchilari g‘oliblik uchun bahs yuritishmoqda.
E'tiborlisi, mazkur musobaqada Vatanimiz sharafini himoya qilayotgan Dmitriy Xorlin 400 metr masofaga erkin usulda suzish bo‘yicha bo‘lib o‘tgan bahslarda 4:09,36 soniya natija qayd etib, jahon chempionatining bronza medaliga sazovor bo‘ldi. Dmitriy, shuningdek, ushbu ko‘rsatkich bilan Osiyo rekordini ham yangilashga muvaffaq bo‘ldi.
2012 yili London shahri (Buyuk Britaniya)da o‘tkazilgan Paralimpiya o‘yinlari hamda 2014 yili Incheon (J.Koreya)da bo‘lib o‘tgan Paraosiyo o‘yinlarida bir necha bor qit'a rekordini yangilagan yana bir yurtdoshimiz Kirill Pankov ham mazkur jahon chempionatida erkin va chalqancha usulda suzish musobaqalarida munosib ishtirok etib, yana bir bora Osiyo rekordlarini yangilashga erishdi. Jahon chempionati 19 iyulga qadar davom etadi.
O‘zbekiston Milliy Olimpiya qo‘mitasi matbuot xizmati.