Suriyada "Al-Qoida" yetakchilaridan biri yo‘q qilindi

Suriya hududida AQSh Harbiy-havo kuchlari samolyotlari amalga oshirgan amaliyotlar natijasida "Al-Qoida" guruhi yetakchilaridan biri Muhsin al-Faddi halok bo‘lgan. Bu haqda USA Today nashri xabar berdi.

Pentagon vakili Jyeff Devis ma'lumotlariga ko‘ra, ushbu terrorchi Suriyaning shimoli-sharqida, Turkiya bilan chegara hududdagi Sarmad shahri yaqinida yo‘q qilingan.

Ma'lumot uchun, Muhsin al-Faddi "Al-Qoida"ning "Xuroson" bo‘limini boshqargan va 2001 yilning 11 sentabrida AQShda amalga oshirilgan teraktga aloqador bo‘lgan.

Pentagondagilar "Xuroson" guruhini "IShID"dan ko‘ra xavfliroq deb bilishadi.

Biroz oldinroq, AQSh hukumati uning joylashgan o‘rni haqidagi ma'lumot uchun 7 mln dollarlik mukofot e'lon qilgandi.