Janubiy Koreyada 6,5 ming mahbus afv etildi

Koreya Respublikasi prezidenti Pak Kin Xe Ikkinchi jahon urushi yakunlanganining 70 yilligi munosabati bilan mamlakatdagi 6527 mahbusni afv etdi. Bu haqda Reuters axborot agentligi xabar bermoqda. 

Umumiy afvga tushganlar orasida SK Group oilaviy xoldingi rahbari Choy Txe Uon ham bor. Uning rafiqasi Janubiy Koreyaning sobiq prezidenti Ro De Uning qizi hisoblanadi. 2013 yilda tadbirkor 40 mln dollarni o‘g‘irlaganlikda ayblanib, 4 yilga ozodlikdan mahrum etilgan edi. Bu jazo muddati bunday darajadagi tadbirkor uchun rekord muddat bo‘lgan edi.

Janubiy Koreya prezidenti Pak Kin Xening aytishicha, “afv etilganlar ro‘yxatiga kiritilgan bir qator tadbirkorlarning ozod etilishi mamlakat duch kelayotgan muammolarni hal qilish, iqtisodiyotni ko‘tarish va yangi ishchi o‘rinlarni yaratish uchun zarur”.