O‘zbekiston chegarachilari Qirg‘iziston fuqarosini yaraladi

O‘zbekiston chegarachilari davlat chegarasini buzib o‘tishga harakat qilgan Qirg‘iziston fuqarosini yaraladi. Bu haqda chegara qo‘mitasi matbuot xizmati xabar berdi.
Aytilishicha, 4 sentabr kuni soat 15:25da Namanganning Yangiqo‘rg‘on tumani Oqtom qishlog‘i yaqinida chegarachilar chegarani buzib o‘tishga harakat qilayotgan shaxsni ko‘rib qolishgan. Ogohlantirishga qaramay, chegarani buzgan shaxs qochishga harakat qilgan.

Uni to‘xtatish uchun dastlab havoga o‘q uzilgan, so‘ng Qirg‘iziston fuqarosi tomonga o‘q uzilib, u yaralangan.
Aniqlanishicha, u Jalolobod viloyatining Olabuqa tumanidagi Mozor qishlog‘ida istiqomat qiluvchi 24 yoshli A. Tojimatovdir. U Yangiqo‘rg‘onda jarrohlik amaliyotidan o‘tkazildi. Hozir Tojimatovning ahvoli yaxshi ekanligi aytilmoqda.
Xabarnomada ta'kidlanishicha, Tojimatovning telefonidan diniy mazmundagi yozuvlar topildi. Voqea yuzasidan jinoiy ish qo‘zg‘atildi.