Qirg‘izistonning ko‘zga ko‘ringan davlat arbobi Turdaqun Usubaliyev olamdan o‘tdi. Bu haqda Qirg‘iziston hukumati matbuot xizmati xabar berdi.
Siyosatchi dushanba kuni Bishkekda 96 yoshida vafot etdi.
Buning yuzasidan Qirg‘iziston prezidenti Almazbek Atambayevga ta'ziya xati yo‘llagan Qozog‘iston prezidenti Nursulton Nazarboyev Usubaliyevning Qirg‘iziston tarixida tutgan muhim o‘rnini alohida qayd qilib o‘tdi.
Turdaqun Usubaliyev 1919 yil 6 noyabrda Norin viloyatining Qo‘chqor qishlog‘ida dunyoga kelgan. U 1961-1985 yillarda Qirg‘iziston Kommunistik partiyasi ijroiya qo‘mitasi birinchi kotibi bo‘lgan, ya'ni amalda 25 yil Qirg‘izistonga rahbarlik qilgan.
U ko‘plab mukofotlarga sazovor bo‘lgan. Qirg‘iz Respublikasi Qahramoni sifatida “Oqshumqor” faxriy belgisi bilan taqdirlangan.